Ayni kunlarda xonanda Ozoda Nursaidova sakkiz kunlik yakkaxon konsert dasturiga tayyorgarlik ko‘rmoqda. “Daryo” muxbirlari konsertning tayyorgarlik jarayonlarida ishtirok etib, eksklyuziv reportaj tayyorlashdi. Xonanda bu yilgi konsertda nimalarga alohida e’tibor bergani, ko‘ngli to‘lmaydigan jihatlar haqida so‘zlab berdi.
“Yomg‘irlarda” deb nomlangan konsert dasturida qo‘shiq to‘liq jonli ijroda kuylanadi. Odamda mashhur xonandalar o‘zlarining reytinglariga mos hamkasblari bilan duet kuylashga harakat qilishadi. Qizig‘i shundaki, Ozoda Nursaidovaning bu yilgi duetdoshlari mashhurlar emas.
— Konsert oldi Instagram tarmog‘ida chellenj e’lon qildi. Unda 500 dan ortiq iqtidorli yoshlar ishtirok etishdi. Ular orasidan eng zo‘r uchtasini tanlab olib, konsertda ular bilan duet ijro etyapman. To‘g‘risini aytadigan bo‘lsam, bu ijrochilar uncha-muncha taniqli xonandalardan ko‘ra qo‘shiqni yaxshi ijro etadi. Taniqli xonanda bilan duet kuylaganim hech narsani o‘zgartirmaydi. U mening yordamimsiz ham tanilib bo‘lgan. Yosh ijrochilarga esa biroz turtki va ko‘mak kerak. Ularga yo‘l ochish ham savob ish hisoblanadi, — deydi xonanda Ozoda Nursaidova.
Xonandaning bloger Liil Hurramov bilan ijro etgan dueti ko‘plab tanqidlarga sabab bo‘lgandi. U bilan duet kuylanishining asosiy sababi nimada? Bu savolga xonanda quyidagicha javob berdi.
— “Bloger bilan qo‘shiq kuylash sizga yarashmabdi. Uyat emasmi?” deganlar ko‘p bo‘ldi. Men blogerdan qo‘shiqchi yasab olganim yo‘q. Qo‘shiqning ma’nosiga e’tibor berilsa, duetning kuylanishining asosiy maqsadi tushuniladi. Ya’ni qo‘shiqda men Ozoda Nursaidova bo‘lib blogerga qarata “Ey jipiriq, sen qayerdan paydo bo‘lib qolding?” deb u bilan tortishganman. Bu qo‘shiq qaysidir ma’noda kichkina telefon kamerasiga ortiqcha baho berayotgan blogerlarga murojaat bo‘lgan, — deydi Ozoda Nursaidova.
Xonanda sahna liboslariga alohida e’tibor berishi va bu yil ham xorijlik mashhur dizaynerlar bilan hamkorlik qilayotgani haqida aytib o‘tdi.
.jpg)
— Sahna estetikasi degan narsa bor. Men ham oddiy, kundalik kiyimlarda sahnaga chiqsam bo‘ladi. Ammo buni muxlisga nisbatan hurmatsizlik deb bilaman. Har kuni to‘ydamiz, odamlar u yerda ham qo‘shiqlarimizni eshitaveradi. Ammo san’at saroyidagi chiqish butunlay boshqacha bo‘lishi kerak. Muxlis tomoshabin biletga pul sarflab konsertga kelyaptimi, unga estetik zavq berolish kerak.
Bu yilgi liborslarimni moskvalik, turkiyalik va o‘zbekistonlik dizaynerlik bilan hamkorlikda yaratyapmiz. Yana biri rus dizayneri yaratsa, ikkinchisini turkiyalik mohir dizayner tikdi. Yashirmayman, liboslar uchun katta mablag‘ sarflayman. Ammo biror marta bunga achinmaganman, — deydi xonanda Ozoda Nursaidova.
Ozoda Nursaidovaning omma tanimaydigan duetdoshlari, dardli kuyni chalishi, hazilomuz qo‘shiqlari va “jonli” kliplari... Xullas, bu yilgi dasturning o‘ziga xosliklari ko‘p. YouTube kanalidagi reportajni ko‘rib, bunga o‘zingiz ham amin bo‘lishingiz mumkin.
Izoh (0)