“O‘zmilliybank” AJning Surxondaryo viloyati Qumqo‘rg‘on tumani filiali xodimi sakkiz oy davomida xorijdan kelayotgan mablag‘larni 9 talik kod orqali o‘zlashtirib, shu muddat davomida 170 ming dollarni qo‘lga kiritgan. Biroq, bunda bankning boshqa xodimlari ham ayblanib, qamoqqa olingan. Bu haqda Qarshi shahridagi sayyor qabulda Bosh prokuror Nig‘matilla Yo‘ldoshev qabulida bo‘lgan murojaatchilar maʼlum qildi.
“Mening o‘g‘lim ‘O‘zmilliybank’ning Qumqo‘rg‘on filialida 15 yildan beri bosh hisobchi o‘rinbosari bo‘lib ishlaydi. Shu bankning Rossiyadan kelgan pullarni egalariga tarqatuvchi chakana bo‘limida ish yuritgan, hali ish boshlaganiga bir yil ham bo‘lmagan xodimi sakkiz oy davomida odamlarga kelgan pullarning 9 talik kodi yordamida olingan puldan tashqari yana shuncha pulni qo‘lga kiritib, shu muddat davomida 170 ming dollarni ‘yeb ketgan’. Buni o‘zidan boshqa hech kim ko‘rmaydi. Buni respublikadan kelgan vakillar ham aytdi. Holat sakkiz oydan keyin ayon bo‘lgan. Bu bolaning qilmishi uchun mening o‘g‘lim va uning uch nafar hamkasbi ham ayblanib, qamoqqa olingan. To‘rt oydan beri bolalarim qamoqda yotibdi”, — deydi Bosh prokurorga bu haqda maʼlumot bergan murojaatchi Manzura Tog‘aynazarova.
Murojaatchilarning aytishicha, bankir 170 ming dollarni qimorga tikib, yutqazib qo‘ygan.
“Asosiy aybdor pulni qimorga yutqazib qo‘ygan. Lekin bu pulni undirish uchun Surxondaryo viloyati IIB xodimlari mening o‘g‘lim va uning uch nafar hamkasbini qo‘shib ayblab, pulni o‘zlashtirgan bolaning puli yo‘qligi sabab, hammadan undirishga harakat qilmoqda. Bu haqda tergovchiga qayta-qayta murojaat qilib, adolatsiz ish qilayotganini aytdik”, — deydi murojaatchi.
Maʼlum qilinishicha, mazkur ishda bankning 6 nafar xodimi ayblanmoqda. Shundan 5 nafar erkak xodimga nisbatan 2023-yilning yanvar oyida qamoqqa olish tarzidagi ehtiyot chorasi qo‘llanilgan.
“Bank boshqaruvchisi o‘z ishida, xorijdan kelayotgan pullarning egasiga chiqib ketishini nazorat qiluvchi masʼul ham o‘z ishida, ammo bizning yaqinlarimiz nohaq ayblanib, qamoqqa olingan. Surxondaryo viloyati prokurorining Ravshan Namozov ismli o‘rinbosari bular qamalsin deb hujjatga qo‘l qo‘yib yuborgan. Lekin bunga yetarlicha asos yo‘q”, — deydi Bosh prokuror qabulida bo‘lgan murojaatchilar.
Shikoyatchilarning aytishicha, mazkur jinoyat ishini ko‘rib chiqayotgan masʼul idora vakillari qamoqqa olinganlar 170 ming dollar zararni qoplashlari kerakligi haqida aytgan. Qamalganlarning yaqinlari esa “bizning oilamizga xarom pul kirmagan, bu pullarni o‘zlashtirgan asosiy aybdorlar tashqarida yuribdi, nega endi biz zararni qoplashimiz kerak”, demoqda.
Murojaatchilarni tinglagan Bosh prokuror Nig‘matilla Yo‘ldoshevning masʼullardan aniqlashtirishicha, mazkur holat ayni paytda sudda ko‘rib chiqilmoqda.
“Jarayon ayni paytda sudda ekan, sud ishni ko‘rib chiqib, xulosa qilsin. Biz sud ishiga aralashmaymiz. Lekin tergov paytida bizning xodimlarimiz qandaydir xatoga yo‘l qo‘ygan bo‘lsa, bu holatni aniqlashtiramiz”, — deydi murojaatchilarga javob bergan Bosh prokuror.
Izoh (0)