“Ўзмиллийбанк” АЖнинг Сурхондарё вилояти Қумқўрғон тумани филиали ходими саккиз ой давомида хориждан келаётган маблағларни 9 талик код орқали ўзлаштириб, шу муддат давомида 170 минг долларни қўлга киритган. Бироқ, бунда банкнинг бошқа ходимлари ҳам айбланиб, қамоққа олинган. Бу ҳақда Қарши шаҳридаги сайёр қабулда Бош прокурор Ниғматилла Йўлдошев қабулида бўлган мурожаатчилар маълум қилди.
“Менинг ўғлим ‘Ўзмиллийбанк’нинг Қумқўрғон филиалида 15 йилдан бери бош ҳисобчи ўринбосари бўлиб ишлайди. Шу банкнинг Россиядан келган пулларни эгаларига тарқатувчи чакана бўлимида иш юритган, ҳали иш бошлаганига бир йил ҳам бўлмаган ходими саккиз ой давомида одамларга келган пулларнинг 9 талик коди ёрдамида олинган пулдан ташқари яна шунча пулни қўлга киритиб, шу муддат давомида 170 минг долларни ‘еб кетган’. Буни ўзидан бошқа ҳеч ким кўрмайди. Буни республикадан келган вакиллар ҳам айтди. Ҳолат саккиз ойдан кейин аён бўлган. Бу боланинг қилмиши учун менинг ўғлим ва унинг уч нафар ҳамкасби ҳам айбланиб, қамоққа олинган. Тўрт ойдан бери болаларим қамоқда ётибди”, — дейди Бош прокурорга бу ҳақда маълумот берган мурожаатчи Манзура Тоғайназарова.
Мурожаатчиларнинг айтишича, банкир 170 минг долларни қиморга тикиб, ютқазиб қўйган.
“Асосий айбдор пулни қиморга ютқазиб қўйган. Лекин бу пулни ундириш учун Сурхондарё вилояти ИИБ ходимлари менинг ўғлим ва унинг уч нафар ҳамкасбини қўшиб айблаб, пулни ўзлаштирган боланинг пули йўқлиги сабаб, ҳаммадан ундиришга ҳаракат қилмоқда. Бу ҳақда терговчига қайта-қайта мурожаат қилиб, адолатсиз иш қилаётганини айтдик”, — дейди мурожаатчи.
Маълум қилинишича, мазкур ишда банкнинг 6 нафар ходими айбланмоқда. Шундан 5 нафар эркак ходимга нисбатан 2023 йилнинг январь ойида қамоққа олиш тарзидаги эҳтиёт чораси қўлланилган.
“Банк бошқарувчиси ўз ишида, хориждан келаётган пулларнинг эгасига чиқиб кетишини назорат қилувчи масъул ҳам ўз ишида, аммо бизнинг яқинларимиз ноҳақ айбланиб, қамоққа олинган. Сурхондарё вилояти прокурорининг Равшан Намозов исмли ўринбосари булар қамалсин деб ҳужжатга қўл қўйиб юборган. Лекин бунга етарлича асос йўқ”, — дейди Бош прокурор қабулида бўлган мурожаатчилар.
Шикоятчиларнинг айтишича, мазкур жиноят ишини кўриб чиқаётган масъул идора вакиллари қамоққа олинганлар 170 минг доллар зарарни қоплашлари кераклиги ҳақида айтган. Қамалганларнинг яқинлари эса “бизнинг оиламизга харом пул кирмаган, бу пулларни ўзлаштирган асосий айбдорлар ташқарида юрибди, нега энди биз зарарни қоплашимиз керак”, демоқда.
Мурожаатчиларни тинглаган Бош прокурор Ниғматилла Йўлдошевнинг масъуллардан аниқлаштиришича, мазкур ҳолат айни пайтда судда кўриб чиқилмоқда.
“Жараён айни пайтда судда экан, суд ишни кўриб чиқиб, хулоса қилсин. Биз суд ишига аралашмаймиз. Лекин тергов пайтида бизнинг ходимларимиз қандайдир хатога йўл қўйган бўлса, бу ҳолатни аниқлаштирамиз”, — дейди мурожаатчиларга жавоб берган Бош прокурор.
Изоҳ (0)