Sirdaryo viloyati Shirin shahar Obodonlashtirish boshqarmasi 4—11-may kunlari boshlang‘ich qiymati 70 million so‘mlik tender o‘tkazgan. “Daryo” muxbiri hujjatlarni ko‘zdan kechirib, xarid jarayonida ishtirok etgan korxonalar o‘zaro aloqador ekanini aniqladi.
Tender Shirin shahriga kirish qismidagi arkani alyumin panellar bilan qoplash xizmati uchun o‘tkazilgan. Lot ma’lumotlariga ko‘ra, g‘olib tadbirkor besh kun ichida ishni bajarishi kerak.
Xarid bayonnomasiga ko‘ra, tenderda yutish uchun ikkita MCHJ raqobatlashgan bo‘lib, “Nayada Grupa” oilaviy korxonasi g‘olib, Versal Group korxonasi zaxira yetkazib beruvchi deb topilgan. Shartnoma summasi — 69 million 500 ming so‘m.
Ishtirokchi tadbirkorlik subyektlarining rahbariyati bilan tanishish jarayonida shubhali holat aniqlandi. Gap shundaki, Statistika agentligi ma’lumotlariga ko‘ra, “Nayada Grupa” MCHJning ikki nafar ta’sischisi bo‘lib, Eshonqulov Rustam va Eshonqulova Tojixolning har ikkisi korxonaning 50 foiz aksiyasiga egalik qiladi.
Shubhalisi, tenderda ularga raqobatchilik qilgan Versal Group’ning rahbari Eshonqulov Dostonjon Rustam o‘g‘li hisoblanadi.
Bu ikki shaxsning ota va o‘g‘il bo‘lib chiqish ehtimoli yuqori.
Holat yuzasidan izoh olish maqsadida ikki korxona aloqa raqamlari bilan bog‘lanishga urindik, ammo buning imkoni bo‘lmadi.
Izoh (0)