Сирдарё вилояти Ширин шаҳар Ободонлаштириш бошқармаси 4—11 май кунлари бошланғич қиймати 70 миллион сўмлик тендер ўтказган. “Дарё” мухбири ҳужжатларни кўздан кечириб, харид жараёнида иштирок этган корхоналар ўзаро алоқадор эканини аниқлади.
Тендер Ширин шаҳрига кириш қисмидаги аркани алюмин панеллар билан қоплаш хизмати учун ўтказилган. Лот маълумотларига кўра, ғолиб тадбиркор беш кун ичида ишни бажариши керак.
Харид баённомасига кўра, тендерда ютиш учун иккита МЧЖ рақобатлашган бўлиб, “Наяда Група” оилавий корхонаси ғолиб, Versal Group корхонаси захира етказиб берувчи деб топилган. Шартнома суммаси — 69 миллион 500 минг сўм.
Иштирокчи тадбиркорлик субъектларининг раҳбарияти билан танишиш жараёнида шубҳали ҳолат аниқланди. Гап шундаки, Статистика агентлиги маълумотларига кўра, “Наяда Група” МЧЖнинг икки нафар таъсисчиси бўлиб, Эшонқулов Рустам ва Эшонқулова Тожихолнинг ҳар иккиси корхонанинг 50 фоиз акциясига эгалик қилади.
Шубҳалиси, тендерда уларга рақобатчилик қилган Versal Group’нинг раҳбари Эшонқулов Достонжон Рустам ўғли ҳисобланади.
Бу икки шахснинг ота ва ўғил бўлиб чиқиш эҳтимоли юқори.
Ҳолат юзасидан изоҳ олиш мақсадида икки корхона алоқа рақамлари билан боғланишга уриндик, аммо бунинг имкони бўлмади.
Изоҳ (0)