Toshkent mezbonligida o‘tayotgan boks bo‘yicha 2023-yilgi Jahon chempionatining 10-kungi bahslari 10-may, chorshanba kuni bo‘lib o‘tmoqda.
-67 kg vazn toifasida Asadxo‘ja Mo‘ydinxo‘jayev ikki karra Olimpiada chempioni kubalik Roniel Iglesiasga qarshi jang qilib, g‘alaba qozondi.
Asadxo‘ja avvalgi bosqichlarda yaponiyalik Yuto Vakita va belaruslik Kiril Samadurauni mag‘lub etgandi.
-75 kg vazn toifasida A’loxon Abdullayev vengriyalik Filip Akilov ustidan g‘alaba qozonib, yarim finalga yo‘l oldi.
Abdullayev ushbu bosqichga qadar Mengyang Jao (Xitoy) va Almir Memich (Serbiya) ustidan zafar quchgandi.
Shohjahon Abdullayev (-86 kg) esa amaldagi chempion ozarbayjonlik Alfonso Domingezga qarshi ringga ko‘tarildi. Murosasiz kechgan jangda Dominges Shohjahonni mag‘lub etib, keyingi bosqichga chiqdi.
Shohjahon chorak finalga qadar Qirg‘iziston vakili Erkin Adilbek Uulu va qozog‘istonlik Sagindik Tagambay ustidan g‘alaba qozongan edi.
+92 kg vazn toifasida Bahodir Jalolov qozog‘istonlik Kamshibek Konkabayevga qarshi jang qildi. Jang Jalolovning 5:0 hisobidagi g‘alabasi bilan yakunlandi.
Bahodir avvalgi bosqichlarda bahraynlik Danis Latipov va avstraliyalik Teremoana Teremoanani taslim etgandi.
Shu tariqa 10-kungi janglar o‘z nihoyasiga yetdi. Avvalroq Jasurbek Yo‘ldoshev (-80 kg) va Shodiyor Meliqo‘ziyev (-48 kg) avvalgi bosqichlarda o‘z yurishini to‘xtatgan bo‘lsa, 10-kungi bahslarda Mujibillo Tursunov (-60 kg) ham musobaqadan chiqib ketdi.
Yarim finalga esa Hasanboy Do‘smatov (-51 kg), Oybek Jo‘rayev (-54 kg), Abdumalik Halokov (-57 kg), Ruslan Abdullayev (-63,5 kg), Asadxo‘ja Mo‘ydinxo‘jayev (-67 kg), Saidjamshid Ja’farov (-71 kg), A’loxon Abdullayev (-75 kg), Lazizbek Mullajonov (-92 kg) va Bahodir Jalolov (+92 kg) yo‘llanmani qo‘lga kiritdi.
Izoh (0)