Boks bo‘yicha JCH—2023. Uch nafar o‘zbekistonlik bokschi o‘z janglarini g‘alaba bilan yakunlab, keyingi bosqichga chiqdi

Boks bo‘yicha O‘zbekiston mezbonligida o‘tkazilayotgan Jahon chempionati 9-may kungi dasturidan o‘rin olgan qator janglar yakunlandi.

-54 kg vazn toifasi vakili Oybek Jo‘rayev navbatdagi jangini albaniyalik Ariol Zeneliga qarshi o‘tkazdi. Uch raund davom etgan jangda o‘zbekistonlik bokschi 5:0 hisobidagi g‘alabani qo‘lga kiritdi.

Avvalgi bosqichda Jo‘rayev serbiyalik Tamir Galanovni mag‘lubiyatga uchratgandi.

-67 kg vazn toifasida harakat qilayotgan Asadxo‘ja Mo‘ydinxo‘jayev belaruslik Kiril Samadurauga qarshi ringga chiqdi. Jang to‘liq Mo‘ydinxo‘jayevning ustunligida o‘tdi va hakamlar bir ovozdan O‘zbekiston vakilining g‘alabasini qayd etdi.

Asadxo‘ja bundan oldingi bosqichda yaponiyalik Yuto Vakitadan ustun kelgandi.

-75 kg vazn toifasida O‘zbekiston sharafini himoya qilayotgan A’loxon Abdullayev serbiyalik Almir Memich bilan jang qildi. Dastlabki ikki raundda o‘zbekistonlik bokschi katta ustunlik qayd etdi, so‘nggi raundni serb bokschisi o‘z hisobiga yozdirib qo‘ydi. Yakunda Abdullayev 4:0 hisobi bilan g‘alabani qo‘lga kiritdi.

Abdullayev avvalgi bosqichdan xitoylik Mengyang Jaoni yutgandi.

9-may kungi janglarda Hasanboy Do‘stmatov va Saidjamshid Ja’farov ham keyingi bosqich yo‘llanmasini naqd qilgandi.