Хитойнинг янги мудофаа вазири Ли Шанфунинг июнь ойида Сингапурда ўтказиладиган хавфсизлик саммитида Америка мудофаа вазири Ллойд Остин билан учрашиш эҳтимоли кам, чунки у Россиядан “Су-35” қирувчилари ва C-400 зенит ракета тизимларини харид қилгани учун АҚШ санкцияларига учраган. Бу ҳақда Financial Times ўз манбаларига таяниб хабар берди.
Вашингтоннинг маълум қилишича, Ли Шанфуга қарши чеклов чоралари Остин билан учрашувига халақит бермайди. Аммо нашрнинг бир неча манбаларига кўра, Хитой ҳукумати санкциялар ечилмагунга қадар улар ўртасидаги шахсий учрашувга рози бўлмайди. Шу билан бирга, нашр суҳбатдошлари Оқ уйнинг санкцияларни бекор қилишга имкони йўқлигини таъкидлаган.
Ли Шанфу тайинловга қадар Сичан космодромини бошқарган ва Стратегик таъминот кучлари қўмондони ўринбосари лавозимида ишлаган, 2017—2022 йилларда Хитой Марказий ҳарбий кенгаши қўшинларини тайёрлаш ва таъминлаш департаментига раҳбарлик қилган. 2018 йилда АҚШ Молия вазирлиги мазкур департмент ва шахсан Ли Шанфуга қарши санкциялар жорий этган. Бунга мамлакатнинг Россиядан “Су-35” қирувчи самолётлари ва C-400 зенит ракета тизимларини харид қилгани сабаб бўлган.
Ли Шангу икки ой олдин — мартда Хитой мудофаа вазири лавозимини эгаллади. Шу ойда Америка ҳарбий идораси хитойлик ҳамкасблари билан алоқалар ўтган йил ноябрдан бери узилганини маълум қилди. Bloomberg Тайван атрофидаги вазият ва АҚШ ҳарбийларининг Хитой разведка аэростатларига зарбаларини бунга сабаб қилиб кўрсатди.
Апрель охирларида АҚШ Қозоғистон Россияга ёрдам бериши туфайли иккинчи даражали санкцияларга дуч келиши мумкинлигидан огоҳлантирганди. Шунингдек, Ҳиндистон АҚШ санкцияларига тушмаган ҳолда Россиядан қурол олиш йўлини қидираётгани маълум бўлган эди. Бир неча кун олдин эса Еврокомиссияси илк бор Россияга ҳарбий мақсадларда ишлатилиши мумкин бўлган ускуналарни етказиб берган Хитойнинг 7 та компаниясини санкциялар рўйхатига киритди.
Изоҳ (0)