Тошкент шаҳар Мирзо Улуғбек туманида набира бувисини калтаклаб, унинг ўлимига сабабчи бўлди. Бу ҳақда “Миллар” кўрсатувида маълум қилинди.
Иш ҳужжатларига кўра, набира воқеа содир бўлган кунда спиртли ичимлик ичган ва маст ҳолатда бувисиникига борган. Шундан кейин 91 ёшли буви ҳамда набира ўртасида келишмовчилик юзага келган. Натижада у аёл танасининг бир қанча жойига уриб, оғир тан жароҳати етказган.
“Ароқ ичиб, бувимникига бордим. У доимгидек норозиликларини билдирди, ҳақорат қилди. Бу фақат ўша кундаги ҳолат эмас, балки 10 йилдан бери такрорланаётган жараён эди. Бувим кекса бўлгани боис анча инжиқ ва атрофдагиларга нисбатан норози кайфиятда бўлиб қолганди, атайлаб жанжал чиқаришга уринарди”, — дейди набира.
Судланувчининг сўзларига кўра, у бувисиникига уй телефонини улаб бериш учун борган, аёлни ўлдириб қўйгач эса аввал онасига, сўнг “102”га қўнғироқ қилган.
Жиноят ишлари бўйича Мирзо Улуғбек туман судида кўриб чиқилган ишда судланувчи Жиноят кодексининг 97-модда (қасддан одам ўлдириш) 2-қисми билан айбдор деб топилди. Унга нисбатан 15 йил муддатга озодликдан маҳрум қилиш жазоси тайинланди.
Март охирларида Тошкент шаҳар Миробод туманида ўз бувисини уриб ўлдирган йигит 8 йилга қамалганди. Воқеа содир бўлган куни судланувчи йигит маст ҳолатда бўлган. Спиртли ичимлик таъсирида бувиси билан жанжаллашган. Оқибатда судланувчи бувисининг турли қисмларига тан жароҳати етказган. Тез ёрдам келгач жабрланувчида биологик ўлим ҳолатини қайд этган.
Изоҳ (0)