Toshkent shahar Mirobod tumanida o‘z buvisini urib o‘ldirgan yigitga sud hukmi o‘qildi. Bu haqda “Zamon” dasturida xabar berildi.
Xabarga ko‘ra, voqea sodir bo‘lgan kuni sudlanuvchi yigit mast holatda bo‘lgan. Spirtli ichimlik taʼsirida buvisi bilan janjallashgan. Oqibatda sudlanuvchi buvisining turli qismlariga tan jarohati yetkazgan. Tez yordam kelgach jabrlanuvchida biologik o‘lim holatini qayd etgan.
Sudlanuvchi o‘sha kuni sodir bo‘lgan voqea haqida gapirib berdi va buvisini ehtiyotsizlik sabab yiqitib qo‘yganini aytib o‘tdi.
“Buvim bilan taxminan 10 yildan buyon yashar edik. Ota-onam vafot etgan. Buvim 85 yoshda edi. Bir yildan beri yurolmasdi. Uning yagona boquvchi va parvarishlovchisi edim. Vaqti-vaqti bilan spirtli ichimlik ichaman. O‘sha kuni ham mast edim. Avvaliga buvimni ovqatlantirdim, hatto bir qadah aroq ham quyib bergandim. Ehtiyotsizlik tufayli uni yiqitib qo‘ydim. Keyin jahlimni chiqargani uchun urdim ham. Ertalab o‘zini yomon xis qilayotgandi. Unga dori berib tez yordam chaqirdim va uxlab qoldim. Shifokorlar o‘lib qolganini aytishdi”, deydi yigit.
Jinoyat ishlari bo‘yicha Mirobod tuman sudida ko‘rib chiqilgan majlisda esa tomonlar teng ravishda tinglandi. Ishga doir materiallar, shuningdek, guvohlar ko‘rsatmasini hisobga olgan holda hukm eʼlon qilindi. Unga ko‘ra, sudlanuvchi Jinoyat kodeksining 104-moddasi 3-qismida nazarda tutilgan jinoyatni sodir etganlikda aybdor deb topildi va 8 yil muddatga ozodlikdan mahrum etildi.
Izoh (0)