Jizzaxda viloyat sud boshqaruvchilar assotsiatsiyasi aʼzosi 12 million so‘m pora bilan qo‘lga tushgani haqida xabar berilgan edi. Sudyalar oliy kengashi holat yuzasidan munosabat bildirdi.
Munosabatda sud boshqaruvchilari — sud tizimi vakillari emasligi, ular sud xodimi hisoblanmasligi taʼkidlangan. Qonunga ko‘ra, yuridik va jismoniy shaxslar, shuningdek, yakka tartibdagi tadbirkorlar faqat sud tomonidan to‘lovga qobiliyatsiz deb topilishi mumkin. To‘lovga qobiliyatsizlik (bankrotlik) tartib-taomillarini o‘tkazishga masʼul shaxs ham vakolatli organ tavsiyasiga asosan iqtisodiy sud tomonidan tayinlanishi maʼlum.
Qayd etilishicha, sud boshqaruvchilarining sud xodimlari tarkibiga kirmasligining yana bir huquqiy asosi — ularning huquq va majburiyatlari, vakolati va faoliyatiga doir boshqa masalalar “Sudlar to‘g‘risida”gi qonun bilan emas, balki umuman boshqa normativ-huquqiy hujjatlar, yaʼni “To‘lovga qobiliyatsizlik to‘g‘risida”gi qonun va Vazirlar Mahkamasining 765-son (12.09.2019y.) qarori bilan tasdiqlangan nizom bilan tartibga solingan.
Fevral oxirlarida DXX, prokuratura, sud, Milliy gvardiya va advokatura xodimlarini jinoyat ustida qo‘lga olgani, 2022-yil yanvarda Farg‘onada prokuror 1 000 dollar pora bilan qo‘lga tushgani, 2021-yilda esa Andijon prokuraturasi xodimi 15 ming dollar pora bilan ushlangani to‘g‘risida xabar berilgandi.
Izoh (0)