Jizzax viloyati G‘allaorol tumanida 23 yoshli yigit ayoli va 5 yoshli farzandini bo‘g‘ib o‘ldirib, yoqib yuborgani haqida xabar berilgan edi. Mazkur yigitga nisbatan sud hukmi o‘qildi.
Voqea tumandagi Zargar qishlog‘idan o‘tgan Toshkent—Termiz avtomobil yo‘li yoqasidagi qirlikda sodir bo‘lgan. Qotillik to‘g‘risida xabar berilgach, IIB xodimlari holat ro‘y bergan joyga kelib, o‘rganish ishlarini olib borgan.
Aniqlanishicha, qotillik sodir etgan shaxs o‘zidan 7 yosh katta bo‘lgan, sharʼiy nikohda yashab kelgan xotini hamda farzandini avval o‘ldirib, so‘ng yoqib yuborgan. Bunga ayolning xiyonat qilgani sabab sifatida ko‘rsatilgan.
O‘rganishlar davomida yigit 2000-yilda Buxoro viloyati G‘ijduvon tumanida tug‘ilgani, 1993-yilda tug‘ilgan ayol bilan 5 yil avval tanishib, yashirincha sharʼiy nikohdan o‘tgani, 2017-yilda ular o‘g‘il farzand ko‘rgani maʼlum bo‘lgan. Shuningdek, 2022-yil kuz boshida ayol yana homilador bo‘lgani, yigit Toshkentga ketgan vaqtida uning otasiga qo‘ng‘iroq qilib, haqiqatni qaynotasiga aytib bergani aniqlangan.
Shundan keyin yigit ayolini farzandi bilan Toshkentga chaqirgan. Ayolining qo‘lida ko‘p miqdorda pul borligini bilgan erkak uni xiyonatda ayblab, o‘zaro tortishib qolgan. Bir necha kun yashagach, Buxoroga qaytmoqchi bo‘lgan. Yo‘lga chiqqach, kechki payt Jizzax viloyati G‘allaorol tumani Zargar qishlog‘idagi qirlikda tushib qolib, u yerda 2 soatcha gaplashib o‘tirgan. Suhbat davomida gap yana xiyonatga borib taqalgach, janjal sodir bo‘lgan.
Erkak xotinini avval qo‘li bilan, so‘ng soch quritkich bilan bo‘g‘ib o‘ldirgan. Farzandini olib ketmoqchi bo‘lganda bola onasi bilan qolishini aytgan, shundan so‘ng uni ham sumka tasmasi bilan bo‘g‘ib o‘ldirgan. U xotini va farzandining jasadini kiyimlarga qo‘shib yoqib yuborgan va Buxoroga ketgan.
Mazkur holat yuzasidan sud jarayoni bo‘lib o‘tdi. Unda yigit qilgan ishidan pushaymon ekanligini aytib, barchadan kechirim so‘radi.
“Qilgan ishimdan pushaymonman. Yurtboshimizdan, ota-onamdan kechirim so‘rayman”, — deya yig‘ladi u.
Sud hukmi bilan u Jinoyat kodeksining 97-moddasi 2-qismi va 134-moddasi bilan aybdor deb topilib, umrbod ozodlikdan mahrum etildi.
Izoh (0)