Жиззахда вилоят суд бошқарувчилар ассоциацияси аъзоси 12 миллион сўм пора билан қўлга тушгани ҳақида хабар берилган эди. Судьялар олий кенгаши ҳолат юзасидан муносабат билдирди.
Муносабатда суд бошқарувчилари — суд тизими вакиллари эмаслиги, улар суд ходими ҳисобланмаслиги таъкидланган. Қонунга кўра, юридик ва жисмоний шахслар, шунингдек, якка тартибдаги тадбиркорлар фақат суд томонидан тўловга қобилиятсиз деб топилиши мумкин. Тўловга қобилиятсизлик (банкротлик) тартиб-таомилларини ўтказишга масъул шахс ҳам ваколатли орган тавсиясига асосан иқтисодий суд томонидан тайинланиши маълум.
Қайд этилишича, суд бошқарувчиларининг суд ходимлари таркибига кирмаслигининг яна бир ҳуқуқий асоси — уларнинг ҳуқуқ ва мажбуриятлари, ваколати ва фаолиятига доир бошқа масалалар “Судлар тўғрисида”ги қонун билан эмас, балки умуман бошқа норматив-ҳуқуқий ҳужжатлар, яъни “Тўловга қобилиятсизлик тўғрисида”ги қонун ва Вазирлар Маҳкамасининг 765-сон (12.09.2019й.) қарори билан тасдиқланган низом билан тартибга солинган.
Февраль охирларида ДХХ, прокуратура, суд, Миллий гвардия ва адвокатура ходимларини жиноят устида қўлга олгани, 2022 йил январда Фарғонада прокурор 1 000 доллар пора билан қўлга тушгани, 2021 йилда эса Андижон прокуратураси ходими 15 минг доллар пора билан ушлангани тўғрисида хабар берилганди.
Изоҳ (0)