Тошкент мезбонлигида ўтаётган бокс бўйича Жаҳон чемпионатининг чорак финал баҳслари якунланди. Бу босқичда рингга кўтарилган 11 нафар ўзбекистонлик боксчининг 9 нафари ғалаба қозонди ва ярим финалга йўл олди.
Жаҳон чемпионатининг ярим финал жанглари 12 май куни бўлиб ўтади. Қуйида ўзбекистонлик жангчиларнинг рақиблари келтирилган.
- -51 кг: Ҳасанбой Дўстматов – Молина Салвадор (Испания);
- -54 кг: Ойбек Жўраев – Дмитрий Двали (Россия);
- -57 кг: Абдумалик Ҳалоков – Мунарбек Сейитбек Уулу (Қирғизистон);
- -63,5 кг: Руслан Абдуллаев – Ҳовҳаннес Бачков (Арманистон);
- -67 кг: Аълохон Мўйдинхўжаев – Баттумур Мишеелт (Мўғулистон);
- -71 кг: Саиджамшид Жаъфаров – Вандерсон Де-Оливейра (Бразилия);
- -75 кг: Аълохон Абдуллаев – Вандерлей Перейра (Бразилия);
- -92 кг: Лазизбек Муллажонов – Муслим Гажимагомедов (Россия);
- +92 кг: Баҳодир Жалолов – Гадфа Дрисси (Испания).
Ўзбекистонлик боксчиларнинг 9 нафари ярим финалга етиб келди ва бу энг яхши натижа ҳисобланади. Бу босқичда Куба ва Россиядан 6 нафардан, Қозоғистондан 5 нафар, Франция, Грузия, Испания ҳамда Ҳиндистондан 3 нафардан боксчи рингга кўтарилади. Арманистон, Озарбайжон, Бразилия, Мўғулистондан икки нафардан, Хитой, Италия, Иордания, Қирғизистон, Мексика ва Тожикистондан бир нафардан жангчи финал йўлланмаси учун курашади.
Бунгача -80 кг вазнда иштирок этган Жасурбек Йўлдошев мусобақадаги иккинчи жангида Иордания вакили Ҳусейн Иашишга, -48 кг вазн тоифасида жанг қилган Шодиёр Мелиқўзиев эса қозоғистонлик Санжар Ташкенбайга ютқазиб қўйганди.
Шунингдек, -86 кг вазнда Ўзбекистон шарафини ҳимоя қилган Шоҳжаҳон Абдуллаев чорак финалда амалдаги чемпион Алфонсо Домингезга (Озарбайжон), -60 кг вазнда рингга кўтарилган Мужибилло Турсунов эса россиялик Всеволод Шумковга ютқазиб, мусобақадаги юришини тўхтатганди.
Изоҳ (0)