O‘zbekiston maktablarda arab tilini xorijiy til sifatida o‘qitish yo‘nalishida Liviya bilan hamkorlik qiladi

Maktabgacha va maktab ta’limi vaziri Hilola Umarova Butunjahon ta’lim forumi doirasida ta’lim vazirliklari delegatsiyalari bilan uchrashdi. Bu haqda vazirlik axborot xizmati xabar berdi.

Liviya oliy ta’lim va ilmiy tadqiqot vaziri Doktor Omran Muhammad al Giyib tomonidan O‘zbekiston umumiy o‘rta ta’lim tizimida arab tilini xorijiy til sifatida o‘qitish yo‘nalishida hamkorlik, jumladan, Liviya tomonidan arab tilida dars beruvchi o‘qituvchilar uchun Liviya oliy ta’lim muassasalarida magistr va ilmiy tadqiqot (PhD) ta’limi uchun ta’lim grantlari ajratish taklifi berildi.

Vazir Hilola Umarova, shuningdek, Hindistonning Assam shtati federal ta’lim vaziri Doktor Ranoj bilan suhbat davomida ingliz tili va informatika yo‘nalishlaridagi oliy ta’lim muassasalari bitiruvchilarini O‘zbekistondagi umumiy o‘rta ta’lim muassasalariga “ustoz-shogird” modeli asosida amaliyotga va ta’lim jarayoniga jalb etish masalasi muhokama qilindi. Doktor Ranoj ushbu masalada vazirlikka amaliy yordam berishga roziligini bildirdi.