O‘zbekistonning ikki viloyati: Toshkent va Samarqandda gaz hamda “svet”dan noqonuniy foydalanganlar 2,3 mlrd so‘mdan ziyod zarar yetkazdi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, Bosh prokuratura huzuridagi departamentning Narpay tuman bo‘limi tomonidan gaz taʼminoti bo‘limi xodimlari bilan hamkorlikda o‘tkazilgan tergovga qadar tekshiruvlarda, Narpay tumanida yashovchi Sh.S. va “X.B.” fermer xo‘jaligi rahbari U.N. yashirin ohak ishlab chiqarish sexi tashkil etib, jami 1,7 milliard so‘mlik tabiiy gazdan noqonuniy foydalangani aniqlangan.
Shu kabi, Samarqand tumanida “A.X.” fermer xo‘jaligi, Yuqori Chirchiq tumanida “Y.O.” MCHJ, Qibray tumanida “F.Y.” MCHJ, Toshkent tumanida “Sh.O.” fermer xo‘jaligi va Yangiariq tumanida fuqaro J.T. tabiiy gaz va elektr tarmoqlariga o‘zboshimchalik bilan ulanib, jami 661,4 million so‘mlik tabiiy resurslardan noqonuniy foydalangani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) va 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)