Европанинг энг “велосипедлашган” давлати Дания ҳисобланса, ундан кейинги ўринларда Нидерландия, Бельгия ва Германия келади. Велосипед ихлосмандлари учун энг қулай немис шаҳри Мюнстер саналади. Бироқ Германияда, жиноят полицияси идорасининг маълумотларига кўра, ҳар йили 335 мингга яқин велосипед ўғрилиги содир этилади. Аслида рақамлар бундан ҳам юқори бўлиши мумкинлиги рад этилмаган.
Шунинг учун Германияда велосипедлар учун ўғриликдан, бахтсиз ҳодисалардан, тунги ўғриликлардан суғурта тизими мавжуд. Велосипедчиларнинг ҳуқуқлари Умумгерман велоклуби (ADFC) ва ҳудудий ташкилотлар томонидан ҳимоя қилинади. Йўлларда қоидабузарлик содир этган велосипедчилар учун қонунда бир қатор жарималар кўзда тутилади. Масалан, рулда вақти телефонда суҳбатлашиш 25 евро, қоронғуда чироқларни ёқмаслик 20 евро, светофорнинг қизил чироғида ўтиб кетиш 45 дан 160 еврогача тўлашга олиб келади. Бундан ташқари, 1,6 промиллдан юқори маст ҳолдаги бошқарув ҳам тақиқланади.
Ҳар йили олмон диёрида “Ишга велосипедда” акцияси ўтказилади. Иштирокчилар ADFC сайтида рўйхатдан ўтиб 1 майдан 31 августгача офисгача велосипедда борган кунларини белгилаб боришади. Улар бир-бири билан босиб ўтган масофалар борасида беллашиб, ижтимоий тармоқларда #mitdemradzurarbeit ҳештеги билан рекордларини ёзиб, совринлар ўйнашади. Веломарафонлар-у, велокўргазмалар эса Германия учун одатий анъанага айланган.
Умумгерман велоклуби (ADFC) 160 мингдан ортиқ аъзога эга. Ҳар йили ушбу клуб сафарлар сони ва махсус сўровнома орқали мамлакат бўйлаб энг машшур кўп кунлик йўналишларни аниқлайди. 2021 йилда Германияда 3,9 миллион мана шундай кўп кунлик велосаёҳатлар амалга оширилган. 2019 йилда, яъни пандемиядан аввал бу рақам 5,4 миллионтани ташкил этган. Аммо шу билан бирга 1 кунлик велосаёҳатлар сони анча оммалашган. Масалан, 2021 йилда 41 миллион аҳоли вакили ҳеч бўлмаса 1 марта мана шундай қисқа сафарга чиққан.
“Дарё” фотомухбири Мадина Нурман Берлин ва Поцдам шаҳарларида бўлиб, у ердаги велосипедчиларнинг эътиборга молик суратларини тақдим этди.
Изоҳ (0)