Toshkent viloyatida xalqaro velosport musobaqasi o‘tkazilishi tufayli ayrim yo‘llar 4 kunga vaqtincha yopildi

Velosportning shosse turi bo‘yicha Oqtosh—Chorbog‘ Mountain xalqaro musobaqasi o‘tkazilishi munosabati bilan 10 ,11, 13, 14-may kunlari soat 08:00 dan 17:00 ga qadar Toshkent viloyatining Bo‘stonliq va Yuqori Chirchiq tumanlaridan o‘tgan avtomobil yo‘llari vaqtinchalik yopiladi. Bu haqda IIV YHXX axborot xizmati xabar berdi.

Qayd etilishicha, 10-may kuni Bo‘stonliq tumani hududidan o‘tgan 4P10 “Chorbog‘ suv ombori halqa yo‘li” avtomobil yo‘lining 80-70 kilometri (Chorbog‘ suv ombori ko‘prigi) oralig‘ida harakat cheklanadi. Keyingi kunlarda yopiladigan yo‘llar ro‘yxati quyidagicha:

11-may kuni:

• Bo‘stonliq tumaniga olib boruvchi 4P12 Bektemir—Chorbog‘ qo‘rg‘oni avtomobil yo‘lining 54-kilometridan (G‘azalkent shahriga kirish) 75-kilometrigacha (“Bochka” ovqatlanish joylari) bo‘lgan yo‘l;
• 4P6 Toshkent shahri—Chirchiq shahri—Chimyon avtomobil yo‘lining 52-kilometridan (G‘azalkent futbol o‘yingohi) 56-kilometr (Glavasoy qishlog‘iga chiqish joyi) oraliqlari;
• 4P10 “Chorbog‘ suv ombori halqa yo‘li” avtomobil yo‘lining 80–82-kilometr oraliqlari (Chorbo‘g‘ suv ombori ko‘prigi va “eski bochka” oraliqlari).

13-may kuni:

Bo‘stonliq tumaniga olib boruvchi 4P12 Bektemir—Chorbog‘ qo‘rg‘oni avtomobil yo‘lining 34-kilometridan (Chirchiq shahriga kirish ko‘prigi) 54-kilometriga (G‘azalkent shahriga kirish) qadar;

14-may kuni:

• Bo‘stonliq tumaniga olib boruvchi 4P12 Bektemir—Chorbog‘ qo‘rg‘oni avtomobil yo‘lining 17-kilometridan (Yangi O‘zbekiston bog‘i atrofi) 75-kilometrigacha (“Bochka” ovqatlanish joylari) bo‘lgan yo‘l;
• 4P6 Toshkent shahri—Chirchiq shahri—Chimyon avtomobil yo‘lining 56-kilometridan (Glavasoy qishlog‘iga chiqish joyi) 72-kilometrigacha (Amirsoy dam olish maskani) bo‘lgan yo‘l oraliqlari;
• 4P10 Chorbog‘ suv ombori halqa yo‘li avtomobil yo‘lining 80–82-kilometr oraliqlari (Chorbo‘g‘ suv ombori ko‘prigi va “eski bochka” oraliqlari)da.

“Hurmatli fuqarolar! Mazkur vaziyatni to‘g‘ri tushungan holda, IIO xodimlarining qonuniy talablarini bajarishingizni so‘raymiz”, — deyiladi xabarda.

19-fevral kuni “Men g‘olib” ommaviy yugurish musobaqasi o‘tkazilishi munosabati bilan Toshkentning qator ko‘chalarida avtomobillar harakatlanishiga vaqtinchalik cheklov qo‘yilgandi. Toshkentda marafon o‘tkazilishi munosabati bilan 5-mart kuni bir qator ko‘chalar yopilgan edi.