“Алоқабанк” масъуллари нафақат мижозини, ОАВ вакилини ҳам алдади. Банк мансабдори берган ваъда ваъдалигича қолмоқда

“Дарё” интернет нашрида Қашқадарё вилоятининг Қарши туманида истиқомат қилувчи фермер Бекзод Фармонов Gentra русумли янги машина харид қилиш учун “Ўзавтосаноат”га “Алоқабанк”нинг Қашқадарё филиали орқали пул тўлагани, аммо мижоз пули банк ходими айби билан ўз вақтида кўрсатилган манзилга тушмагани сабаб машинасини ололмагани, дастлабки шартнома куйгани хабар берилганди. “Алоқабанк” мазкур мақолага муносабат билдириб, камчиликка йўл қўйилгани учун филиал раҳбарига ҳайфсан берилганини, ходимлари огоҳлантирилганини билдирди. Ва мижози ҳуқуқининг поймол бўлмаслиги учун унинг муаммосига 2 хил усулда ечим қилмоқчилигини, қай бирини танласа банк раҳбарияти буни бажаришга тайёрлигини маълум қилганди.

“Банк икки хил усул орқали ходимлари йўл қўйган хатони тўғирламоқчи бўлишганини, хоҳласам иккинчи шартнома муддати 2023 йилнинг декабрь ойига қадар миниб туриш учун Gentra русумли машина бериб туришларини, хоҳласам машина учун салонга тўлаган 153 миллион сўм пулимга қўшимча қўшиб, бозордан шу русумдаги янги машинани сотиб олиб беришларини айтишганди. Мен кимнингдир машинасини минишни истамаганим учун иккинчи йўл — иккиламчи бозордан пулимга пул қўшиб янги машина олиб беришларини танлагандим. Шу келишувга кўра улар аввалига бир ҳафта кутиб туринг пул муаммосини ҳал қилайлик дейишди. Айтилган мудат келгач, яна бир ҳафта кутинг, муаммолар ечилсин дейишди. Иккинчи айтилган муддат келганда ҳам ОАВ вакиллари орқали яна бир ҳафта муддат сўрашиб, ой якун бўлсин, ойнинг охирида ваъдамизни бажарамиз дейишди. Апрель ойи якуни ва майнинг дастлабки ўн кунлигида ҳам пулни нақдлаштиролмаяпмиз деган баҳона билан ваъдасини бажармади”, — дейди банкнинг алдовларидан тўйганини айтган мижоз Бекзод Фармонов.

2023 йилнинг 7 апрель куни “Дарё” журналисти билан мулоқот қилган масъул — банк бошқаруви раиси ўринбосари Ҳасан Раҳматов мижоз манфаатини ҳимоя қилиш учун банк ёрдамга тайёрлигини, ходимлари йўл қўйган хатони тўғирлаш учун мижозига 2 та вариант таклиф қилиб, мижози истаган вақтда муаммони ҳал қилишини билдирганди. Ва таҳририят банкнинг муаммо ечимига тайёрлигини ҳам билишлари лозимлигини таъкидлаганди. Шунга кўра “Дарё”да “‘Бозордан машина сотиб олса харажати қопланади ёки автомобили чиққунга қадар фойдаланиб туриш учун машина берилади’. ‘Алоқабанк’ ‘Дарё’даги мақолага муносабат билдириб, мижози муаммосига ечим айтди”, сарлавҳали материал эълон қилинганди.

Банк таклиф қилган икки вариантдан бири мижоз истаса янги машинаси салондан чиққунга қадар унга ижарага худди шу русумдаги автомобилни олиб бериш бўлса, иккинчиси иккиламчи бозордан мижозининг 153 миллион сўм пулига пул қўшиб янги машина харид қилишига кўмаклашишдан иборат эди. Банк мижози иккинчи усулни танлашига қарамасдан банк ваъдасини бажармади.

“Бу мақсад учун маблағ ажратилган. Аммо уни нақдлаштиришда муаммолар юзага келмоқда. Шу сабаб айтилган муддатда мижоз муаммосини ҳал этолмадик. Бу ҳақда мижозни ҳам хабардор қилганмиз”, — дейди банк ахборот хизмати раҳбари Зуҳра Юнусова.

Банк масъуллари ваъдаларига ишонмай қўйган Бекзод Фармонов “‘Алоқабанк’ ‘мижоз банк учун эмас, банк мижоз учун’, деган тамойилига тескари ишлар экан, бу банкка ишончим қолмади”, дейди.

Мазкур мақола сайтда эълон қилиниши арафасида банк ахборот хизмати раҳбари Зуҳра Юнусова таҳририят журналисти билан боғланиб, банкнинг қашқадарёлик мижози муаммоси бугун, 10 май куни соат 16:00 га қадар ҳал этилишини ваъда қилди.

“Дарё” воқеалар ривожини кузатишда давом этади.