Qashqadaryo viloyatida bank majburiyatlariga kirmaydigan, yechimi boshqa tashkilotlarga bog‘liq vaʼdani berib, mijozini aldagan bankirga hayfsan berildi. Bu haqda “Daryo”ga AT “Aloqabank” axborot xizmati rahbari Zuhra Yunusova xabar berdi.
“Daryo”da “Bankirlarga aldandim — mashinaga pul to‘lab, ololmayotgan mijoz hasrati” sarlavhali maqola eʼlon qilingan bo‘lib, unda Qashqadaryo viloyatining Qarshi tumanida yashovchi fermer Bekzod Farmonov yaxshi niyat bilan hosilidan orttirgan mablag‘iga yangi mashina xarid qilmoqchi bo‘lgani, shu maqsadda bankka borib, qimmat avtomobillardan biriga to‘lov qilgani, biroq bank xodimining aybi bilan to‘lagan puli avtosalon hisob raqamiga tushmagani sabab mashina ololmay sarson bo‘layotgani maʼlum qilingandi.
AT “Aloqabank” axborot xizmati mazkur maqolaga munosabat bildirib, bank mansabdoriga hayfsan qo‘llanganini ochiqladi.
“Mijoz Safarova Muxarram Diyarovna (murojaatchining onasi) AT ‘Aloqabank’ Qashqadaryo HKXKMning ‘Beshkent’ KXKMida 2022-yil 8-iyul kuni ‘Avtosanoat GM’ga Chevrolet Gentra avtomashinasi sotib olish maqsadida 65 million 567 ming so‘m va 12 million 611 ming so‘m to‘lov qilgan. ‘Beshkent’ KXKM operatori G.Muradovadan olingan tushuntirish xatida Colvir ABT dasturida 65 million 567 ming so‘m to‘lovni soat 16:29:07 da va 12 million 611 ming so‘mni soat 16:36:48 da yaratganini hamda MUNIS tizimdan o‘tkazganini yozgan. Yuqoridagi amaliyotlarning to‘g‘ri va o‘z vaqtida bajarilishi ketma-ketligi o‘rganilganda Colvir ABT tizimda soat 16:29:07 da qabul qilingan birinchi to‘lov 65 million 567 ming so‘m soat 17:30:13 da tizim oflayn rejimga o‘tkazilgani sabab (MUNIS tizimi soat 17:30 da oflayn rejimga o‘tkazilgan) bajarilmagani; qabul qilingan ikkinchi to‘lov 12 million 611 ming so‘m pul esa soat 16:36:48 da yaratilgan hamda 17:27:55 da muvaffaqiyatli bajarilgani aniqlandi”, — deyiladi rasmiylar munosabatida.
Qayd etilishicha, 2022-yil 14-sentabr kuni mijoz to‘lovlaridan 65 million 567 ming so‘m pul haqiqatan ham ko‘rsatilgan hisobraqamga o‘tmay qolgani sabab mijoz taqdim etgan boshqa shartnomaga asosan ko‘rsatilgan hisobraqamga qayta ko‘chirilgan.
“Fuqaro murojaatida yo‘llagan video va audioyozuvlar o‘rganilganda, haqiqatan Qashqadaryo HKXKM direktori Alisher Mirzayev fuqaro bilan suhbatida o‘z lavozimi va bank majburiyatlariga kirmaydigan hamda yechimi boshqa tashkilotlarga taalluqli bo‘lgan vaʼdalarni bergani, natijada mijozning haqli eʼtiroziga sabab bo‘lgani aniqlandi. Yuqoridagilardan kelib chiqib, xato va kamchilikka yo‘l qo‘ygan masʼul xodimlarga nisbatan qonunchilikda belgilangan tartibda choralar ko‘rildi va hayfsan berilishi belgilandi”, — deydi bank axborot xizmati rahbari.
Bank axborot xizmati rahbarining “Daryo” nashrining qayta so‘roviga javoban aniqlashtirishicha, filial rahbari Alisher Mirzayevga hayfsan berilgan. Xatoga yo‘l qo‘ygan xodimga esa ogohlantirish qo‘llangan.
Izoh (0)