Potsdam Germaniyaning Brandenburg yerida joylashgan eng chiroyli va yashil shaharlaridan biri sanaladi.
Bu yer Prussiya qirollarining sobiq qarorgohi, shuningdek, fashistlar Germaniyasi o‘zining rasmiy mavjudligini boshlagan va tugatgan shahar sifatida tanilgan. Potsdam 1945-yilda SSSR, AQSH va Buyuk Britaniya davlat rahbarlarining konferensiyasiga mezbonlik (Berlin konferensiyasi) qilgani bilan ham mashhur. Potsdam konferensiyasi —Ikkinchi jahon urushida g‘alaba qozongan davlatlarning boshliqlari — Iosif Stalin (SSSR), Garry Truman (AQSH) va Uinston Cherchill (28-iyuldan — Klement Attley, Buyuk Britaniya) ishtirok etgan yirik siyosiy tadbir. Berlin (Potsdam) konferensiyasi maqsadi urushdan keyingi dolzarb xalqaro muammolarni hal etishdan iborat edi. Ushbu anjumanda Yevropaning urushdan keyingi tuzilishi masalalari yuzasidan qaror qabul qilingan. Germaniyani to‘la demilitarizatsiyalash, uning monopoliyalarini yo‘q qilish, fashistlar hujumiga uchragan davlatlarga urush natijasida yetkazilgan zararni qoplash uchun to‘lanadigan reparatsiya, Polshaning g‘arbiy chegaralari to‘g‘risida qarorlar chiqarilgan.
Zamonaviy Potsdam — universitet shahri va nemis kino sanoatining markazi. Bu yerda amaliy polimerlar va biotibbiyot muxandisligi sohasida tadqiqotlar olib boriladi, shaharda astrofizika instituti va iqlim o‘zgarishi instituti mavjud. Shaharda juda ko‘plab ko‘l va daryolar, orollarni uchratish mumkin. Daraxt va o‘simliklar landshaftning to‘rtdan uch qismini egallasa, binolar atigi to‘rtdan bir qismini tashkil etadi. Ularning ayrimlari 1990-yilda YuNESKOning Jahon merosiga kiritilgan saroylar, qal’a kompozitsiyalari hamda bog‘lardan tarkib topgan. Transport yo‘llarining yirik tuguni, Xafel daryosi bo‘yidagi port, mamlakatning tarixiy va madaniy markazlaridan biri hisoblanadi.
“Daryo” fotomuxbiri Madina Nurman Germaniyaga qilgan xizmat safari davomida Potsdamda ham bo‘lib, u yerning diqqatga sazovor manzaralarini kadrlarga muhrladi.
Izoh (0)