Потсдам Германиянинг Бранденбург ерида жойлашган энг чиройли ва яшил шаҳарларидан бири саналади.
Бу ер Пруссия қиролларининг собиқ қароргоҳи, шунингдек, фашистлар Германияси ўзининг расмий мавжудлигини бошлаган ва тугатган шаҳар сифатида танилган. Потсдам 1945 йилда СССР, АҚШ ва Буюк Британия давлат раҳбарларининг конференциясига мезбонлик (Берлин конференцияси) қилгани билан ҳам машҳур. Потсдам конференцияси —Иккинчи жаҳон урушида ғалаба қозонган давлатларнинг бошлиқлари — Иосиф Сталин (СССР), Гаррй Труман (АҚШ) ва Уинстон Черчилл (28 июлдан — Клемент Аттлей, Буюк Британия) иштирок этган йирик сиёсий тадбир. Берлин (Потсдам) конференцияси мақсади урушдан кейинги долзарб халқаро муаммоларни ҳал этишдан иборат эди. Ушбу анжуманда Европанинг урушдан кейинги тузилиши масалалари юзасидан қарор қабул қилинган. Германияни тўла демилитаризациялаш, унинг монополияларини йўқ қилиш, фашистлар ҳужумига учраган давлатларга уруш натижасида етказилган зарарни қоплаш учун тўланадиган репарация, Польшанинг ғарбий чегаралари тўғрисида қарорлар чиқарилган.
Замонавий Потсдам — университет шаҳри ва немис кино саноатининг маркази. Бу ерда амалий полимерлар ва биотиббиёт мухандислиги соҳасида тадқиқотлар олиб борилади, шаҳарда астрофизика институти ва иқлим ўзгариши институти мавжуд. Шаҳарда жуда кўплаб кўл ва дарёлар, оролларни учратиш мумкин. Дарахт ва ўсимликлар ландшафтнинг тўртдан уч қисмини эгалласа, бинолар атиги тўртдан бир қисмини ташкил этади. Уларнинг айримлари 1990 йилда ЮНЕСКОнинг Жаҳон меросига киритилган саройлар, қалъа композициялари ҳамда боғлардан таркиб топган. Транспорт йўлларининг йирик тугуни, Хафел дарёси бўйидаги порт, мамлакатнинг тарихий ва маданий марказларидан бири ҳисобланади.
“Дарё” фотомухбири Мадина Нурман Германияга қилган хизмат сафари давомида Потсдамда ҳам бўлиб, у ернинг диққатга сазовор манзараларини кадрларга муҳрлади.
Изоҳ (0)