Buyuk Britaniya Ukrainaga uzoq masofaga mo‘ljallangan raketalarini bermoqchi. Bu haqda Ukrainani qo‘llab-quvvatlash xalqaro jamg‘armasining (IFU) qurollanish xaridlariga oid e’lonlarini o‘rganib chiqqan The Washington Post gazetasi xabar berdi. Tashkilotga Shimoliy Yevropa davlatlari asos slogan bo‘lib, unda London yetakchi rolni o‘ynaydi.
Hujjatda Britaniya Mudofaa vazirligi 2-may kuni 300 kilometr uzoqlikdagi nishonlarga zarba berish imkoniyatini qo‘lga kiritishga “qiziqish bildirgani” qayd etilgan. Gazeta suhbatdoshining aytishicha, bu borada yakuniy qaror qabul qilinmagan, shuningdek, qancha miqdordagi qurollanish va ularni qachon yetkazib berish haqida gap ketayotganiga oydinlik kiritmagan. Nashrning qayd etishicha, hujjat London tomonidan bu turdagi qurollarni yetkazib berish borasida muhim qadam hisoblanadi.
So‘ralayotgan texnik tavsiflar va imkoniyatlar Britaniyaning Storm Shadow qanotli raketalariga mos keladi. Ularni sovet davriga tegishli Ukraina samolyotlariga o‘rnatish mumkin. Bundan tashqari, Buyuk Britaniya Ukrainaga Storm Shadow raketalarini bermoqchiligi haqida ma’lumotlar Amerika razvedkasining oshkor qilingan maxfiy ma’lumotlarida ham bor.
Ukraina hukumati g‘arb davlatlaridan uzoq masofaga mo‘ljallangan raketalarni so‘rab bir necha bor murojaat qilgan, biroq mojaro chuqurlashib ketishi xavfi sabab rad javobini olgan. Ukraina Mudofaa vazirligi bu kabi xavflarga javoban raketalardan Rossiya hududiga zarbalar bermaslikda va’da bergan, prezident Vladimir Zelenskiy esa bu turdagi qurollarni hayot uchun muhim deb atagan.
Aprel oxirlarida AQSH prezidenti Jo Bayden ma’muriyati Ukrainaga 325 million dollarlik yangi harbiy yordam paketini yuborishi ma’lum bo‘lgandi. Janubiy Koreya prezidenti Yun Sok Yol esa Reuters agentligiga bergan intervyusida, agar Ukraina aholisi “keng ko‘lamli hujum”ga uchrasa, Seul Kiyevga qurol berishni boshlashi mumkinligini aytgan. Bunga javoban Rossiya sobiq prezidenti, amaldagi Xavfsizlik kengashi raisining birinchi o‘rinbosari Dmitriy Medvedev Janubiy Koreya Ukrainaga qurol yetkazib bergan taqdirda, Rossiya Shimoliy Koreyani qurollantirishi bilan tahdid qildi.
Izoh (0)