“Yangilangan Konstitutsiya — inson huquqlarini yuqoriga ko‘taradigan va qadrlaydigan hujjat sifatida shakllandi” — “Adolat” SDP raisi

“Adolat” sotsial-demokratik partiyasi raisi Bahrom Abduhalimov referendum yakunlari, yangilangan Konstitutsiya yuzasidan intervyu berdi.  

Uning so‘zlariga ko‘ra, yangilangan Konstitutsiya qabul qilinishi natijasida davlatga juda katta vazifa va majburiyatlar yuklanyapti. 

“Albatta, bu vazifa va majburiyatlar o‘z-o‘zidan bajarilib qolinmaydi. Buning uchun matonat, intizom, masʼuliyat kerak. Va eng muhimi, bugungi ko‘rsatilgan yo‘nalishlar bo‘yicha faoliyatni olib borish kerak. Biz, ”Adolat“ sotsial demokratik partiyasi vakili sifatida nihoyatda mamnunmiz”, — deydi u. 

Bahrom Abduhalimov yangilangan Konstitutsiyaning 1-moddasida O‘zbekiston huquqiy davlat deb belgilanganini alohida taʼkidlab o‘tdi. 

“Aytish mumkinki, bunda inson huquqlari va erkinlari bilan bog‘liq normalar soni uch baravarga ortmoqda. Buning barchasi shundan dalolat beradiki, yangilangan Konstitutsiya birinchi navbatda inson huquqlarini yuqoriga ko‘taradigan va qadrlaydigan hujjat sifatida shakllandi. Qiladigan vazifalar ham juda ko‘p. Prezidentimiz bugun ikkita muhim hujjatga imzo chekilganini maʼlum qildilar”, — deya qo‘shimcha qiladi “Adolat” SDP raisi.