“Янгиланган Конституция — инсон ҳуқуқларини юқорига кўтарадиган ва қадрлайдиган ҳужжат сифатида шаклланди” — “Адолат” СДП раиси

“Адолат” социал-демократик партияси раиси Баҳром Абдуҳалимов референдум якунлари, янгиланган Конституция юзасидан интервью берди.  

Унинг сўзларига кўра, янгиланган Конституция қабул қилиниши натижасида давлатга жуда катта вазифа ва мажбуриятлар юкланяпти. 

“Албатта, бу вазифа ва мажбуриятлар ўз-ўзидан бажарилиб қолинмайди. Бунинг учун матонат, интизом, масъулият керак. Ва энг муҳими, бугунги кўрсатилган йўналишлар бўйича фаолиятни олиб бориш керак. Биз, ”Адолат“ социал демократик партияси вакили сифатида ниҳоятда мамнунмиз”, — дейди у. 

Баҳром Абдуҳалимов янгиланган Конституциянинг 1-моддасида Ўзбекистон ҳуқуқий давлат деб белгиланганини алоҳида таъкидлаб ўтди. 

“Айтиш мумкинки, бунда инсон ҳуқуқлари ва эркинлари билан боғлиқ нормалар сони уч бараварга ортмоқда. Бунинг барчаси шундан далолат берадики, янгиланган Конституция биринчи навбатда инсон ҳуқуқларини юқорига кўтарадиган ва қадрлайдиган ҳужжат сифатида шаклланди. Қиладиган вазифалар ҳам жуда кўп. Президентимиз бугун иккита муҳим ҳужжатга имзо чекилганини маълум қилдилар”, — дея қўшимча қилади “Адолат” СДП раиси.