Toshkentdagi Sergeli mashina bozorida avtomobillarning o‘rtacha narxi qancha? Gentra qanchadan sotiladi-yu, Nexia-3 ning bahosi necha pul? “Daryo” shu kabi savollarga javob izlab Sergeli mashina bozoridan reportaj tayyorladi.
Unga ko‘ra, 7-aprel holatiga 2023-yilda ishlab chiqarilgan, hali davlat raqami taqilmagan, “texpasport” olinmagan Damas mashinasi 10 ming 800 dollarga baholanadi. 2022-yilda ishlab chiqarilgan xuddi shunday mashina esa 10400—10300 dollar atrofida sotiladi.
Ishlab chiqariglan yili, qancha masofa bosib o‘tgani, metan gaz o‘rnatilgani yoki o‘rnatilmagani, balloni almashtirilgani yoki almashtirilmagani, salonlariga “chexol” qo‘yilgani, boshqa xarajatlar qilinganiga qarab, avtomashinaning narxi ko‘tarilishi yoki tushishi mumkin.
Matiz avtomobilining ishlab chiqarilishi to‘xtatilgani bois bu avtomashina turli ko‘rsatkichlariga qarab 2500 dollardan 5000—7000 dollargacha sotilmoqda.
Mexanik uzatgichli qutiga ega, hali hech qancha masofa bosib o‘tmagan Nexia-3 avtomashinasi 13 ming dollarga sotilmoqda. Bu turdagi mashinalar bozorda eng talabgir hisoblanadi.
Cobalt mashinasining oddiy diskali, ABS-best tormozga ega modeli 14500—14400 dollar narxda baholanmoqda. Saka diskali, sidena materiallarida farqi bor Cobalt esa 14 ming 800 dollarga sotilgan.
Gentra avtomashinasining oq rangli, ideal holatdagi, eng yangi modeli 17 ming 700 dollarga baholanmoqda. Qora ranglisi esa biroz qimmatroq. Gentra’ning bozordagi o‘rtacha narxi 17—18 ming dollar atrofida.
Onix avtomashinasining primer pozitsiyasi uchun 22 ming dollar so‘ralmoqda. LTZ pozitsiyasi esa 19 ming dollar. Bundan boshqa pozitsiyalari ham salon narxidan bir necha ming dollar qimmatroqqa sotilyapti.
Yangi Tracker-2 mashinasi 26 ming dollarga sotilmoqda. Mashinaning rangiga qarab narxlar o‘zgaradi va bozorda o‘rtacha 25000—27000 dollar atrofida baholanmoqda.
Malibu-2 avtomashinasining primer pozitsiyasi — AQSHda ishlab chiqarilgani 37 mingdan 40 ming dollargacha, Xitoyda ishlab chiqarilgani 36 mingdan 38 ming dollargacha sotilyapti. Savdogarlarning aytishicha, bu mashina sotuvidan katta foyda qolmaydi. Asosiy talab Onix, Gentra, Nexia-3 kabi mashinalarga bo‘lmoqda.
Izoh (0)