Ijtimoiy tarmoqlarda O‘zbekistonda xizmat ko‘rsatgan sanʼat arbobi, taniqli haykaltarosh Damir Ro‘ziboyevning asari sindirib tashlangani haqida xabarlar tarqaldi. Mirobod tuman hokimligi holatga munosabat bildirib, oddiy ijtimoiy masalani diniy kelishmovchilikka aylantirmaslikka chaqirdi.
Qayd etilishicha, sanʼat asari sifatida taqdim etilayotgan ushbu haykallar vaqt taʼsirida o‘z muqimligini yo‘qotgan, qolaversa, haykallarning yaxlit emasligi, piramida shaklida bir-birining ustiga qo‘yilgan holatda joylangani qulab tushish xavfini yuzaga keltirgan.
Bu esa shu hududda yashovchi fuqarolar, xususan, bolalarning xavfsizligi uchun qayg‘urayotgan aholining haqli eʼtirozlariga sabab bo‘lgan.
“Ijtimoiy tarmoqlardagi ayrim manbalar, xususan, ‘Eltuz’ kanalida iddao qilinganiday bu o‘rinda hech qanday diniy masala mavjud emas”, — deyiladi munosabatda.
Haykallar haykaltaroshga bolalar uchun ijod maktabi tashkil etish maqsadida ajratilgan hudud sotib yuborilganda, yaʼni taxminan 1,5 yillar oldin ko‘p qavatli uyning oldiga olib chiqilgan va o‘sha vaqtdan buyon asar egasi hamda aholi o‘rtasida haykallarni boshqa joyga olib ketish bo‘yicha o‘tkazilib kelinayotgan muhokamalar hech qanday natija bermagan.
“Shu o‘rinda, xabarni eʼlon qilgan ijtimoiy tarmoq vakillaridan oddiy ijtimoiy masalani diniy kelishmovchilikka aylantirishga urinishdan, omonat haykallarni UNESCO butunjahon merosi obyekti deb tan olingan haykallarga tenglashdan va farzandlari xavfsizligini o‘ylayotgan fuqarolarni radikallikda ayblashdan tiyilishni so‘rardik”, — deya ta’kidlanadi xabarda.
Izoh (0)