Sirdaryo viloyatida bo‘lib o‘tayotgan Xalqaro baxshichilik sanʼati festivalining maqsadi haqida madaniyat va turizm vaziri Ozodbek Nazarbekov jurnalistlarga tushuntirish berdi. Bu haqda “Daryo” muxbiri xabar bermoqda.
Ozodbek Nazarbekovning aytishicha, insoniyat kuylashni aynan mana shu baxshichilik yo‘li bilan rivojlantirib kelgan.
“Bu sanʼat turini qadrlaydigan xalqlar juda ham ko‘p. Olimlarining guvohlik berishicha, mazkur sanʼat tarixi turi xalqlarning ildizi bir joyga olib borayotganini, insoniyat madaniyati bir joydan ko‘karib chiqqanini isbotlab turibdi”, — dedi vazir.
Uning alohida taʼkidlashicha, bo‘lib o‘tayotgan festival tanazzulga yuz tutib borayotgan sanʼat turini qayta jonlanishiga va har bir xalqda ushbu sanʼatni yelkasida ko‘tarib yurgan fidoyilar uchun ham umid bag‘ishlamoqda.
“O‘ylaymanki, festival insoniyatining nomoddiy-madaniy merosini saqlab qolishga katta hissa qo‘shmoqda. Anjuman mana shu sanʼat turini saqlab qolishga xizmat qilsa, biz uchun eng katta marra bo‘ladi. Yaʼniki kelasi avlodga baxshichilikni to‘la-to‘kis yetkazib berish asosiy maqsadimizdir”, — dedi Ozodbek Nazarbekov.
Maʼlumot uchun, Xalqaro baxshichilik festivali har ikki yilda bir marotaba o‘tkaziladi. Birinchi marotaba festival o‘tkazilganda 21 ta mamlakat vakillari ishtirok etgan bo‘lsa, joriy 2023-yilgi anjumanda qatnashish uchun 30 ta mamlakatdan ishtirokchilar ro‘yxatdan o‘tgan.
Izoh (0)