Buxoro viloyatining Jondor tumaniga kirish darvozasida uzoq yillardan buyon tuman aholisining faxriga aylangan tarixiy shaxs — Mahmud Torobiy haykali 2018-yil sababsiz olib tashlangani turli shov-shuvlarga sabab bo‘lgandi. Odamlarning e’tirozi bois keyinchalik voqeaga izoh berilib, tumanda keng ko‘lamli bunyodkorlik ishlari amalga oshirilayotgani sabab haykal vaqtincha olib qo‘yilgani aytilgandi.
Jondor tuman hokimligi axborot xizmati rahbari Sur’at Shomurodovning “Daryo”ga bildirishicha, 2021-yilning 12-yanvar kuni Mahmud Torobiy haykali qayta o‘rnatilgan.
Ta’kidlanishicha, tuman markazida qariyb 5 gektar hududni egallagan xiyobon uzoq yillar davomida qarovsiz qoldirilgan. 2019-yil bu holat Buxoroning o‘sha paytdagi rahbari, marhum O‘ktam Barnoyev tanqidiga uchragan. Va shu sabab xiyobonda ta’mirlash ishlari boshlab yuborilgan. Uch milliard so‘m sarflangan xiyobon 2020-yil zamonaviy ko‘rinishga kelgan. Shundan so‘ng tarix shaxs sifatida gavdalangan Mahmud Torobiy haykalini mazkur xiyobonda o‘rnatish taklifi berilgan.
“Tarixiy manbalarda yozilishicha, 1238-yilda shu yaqin-atrofdagi qishloqlar aholisi Mahmud Torobiy boshchiligida mo‘g‘ul bosqinchilariga qarshi kurashgan. Biroq kuchlar teng bo‘lmagan jangda ozodlik kurashchilari mag‘lub bo‘lgan. Ushbu haykalni shogirdlarimiz bilan birgalikda ona diyorimizning haqiqiy qahramoni qiyofasida tasvirlashga harakat qildik. Haykalning tuman markaziy xiyobonida o‘rnatilgani jondorliklar tomonidan xursandchilik bilan qarshilandi”, — deydi haykaltarosh Qurbon Norxo‘rozov.
Qayd etilishicha, ayni kunda tuman markazidagi xiyobonga Mahmud Torobiy nomidagi vatanparvarlik bog‘i deya nom berilgan.
Izoh (0)