“Бу кунни 15 йил кутдим”. 45 ёшли хонанда Самандар Ҳамроқулов илк марта ота бўлди (видео)

Ўзбекистонда хизмат кўрсатган артист Самандар Ҳамроқулов 15 йил деганда илк марта ота бўлди. Бу ҳақда у “Shok.uz” YouTube каналига берган интервьюсида сўзлаб берди. 




“Аллоҳ Таоло бизга қиз фарзанд берди. Исмларини Марям деб қўйдик. Марям қизимиз 34 кунлик бўлдилар. Алҳамдулиллаҳ, Аллоҳ сабр қилган одамнинг дуосини ижобатсиз қолдирмас экан. Инсон сабрли бўлиши керак экан. Ҳамма яхшиликлар сабр қилган инсонга берилар экан. Бу янгиликни ҳеч қаерда овоза қилишни истамадим. Кўз, назар деган нарса бор. 15 йил аввал фарзанд бўлиб, охиригача ривожланмай нобуд бўлиб қолган пайтда ҳам ичимдан ‘эртароқ хурсанд бўлиб қўйдиммикан’, деган ўй ўтган. ‘Янгилик борми?’, деб сўраган танишларга хурсанд бўлиб, ‘Ҳа, мана бунча ҳафталик бўлди, бунчалик бўлди’, деб айтганман. Шунинг учун кўз тегдимикан, деб ўйлаб қолганман. Шу сабабли бу сафар фарзандли бўлиш хабарини эшитганимда, ҳеч кимга айтишни истамадим”, — дейди хонанда. 

Хонанда икки йил аввал берган интервьюларидан бирида фарзанд асраб олиш нияти борлигини ҳам айтиб ўтган эди. 

“Фарзанд асраб олиш ҳақида ҳар доим ўйлаймиз. Ҳалигача бор бу фикр. Лекин унинг ҳам ўзига яраша қонун-қоидалари бор экан. Асраб олган фарзандингиз ўғил, ўзингизники қиз бўлса, дейлик, улар бошқа-бошқа хоналарда ухлаши керак экан. Чунки асраб олган фарзандингиз ўзингизникига номаҳрам ҳисобланар экан. Бу ҳақда шайх ҳазаратларининг китобларида келтирилган”, — деган эди хонанда.

Шунингдек, у журналистнинг “14 йил давомида аёлингиз билан ажрашиш ёки яна бир бошқа аёлга уйланиш фикри келмаганми?”, деган саволига ҳам жавоб берган.

“Бир инсон қандай қилиб икки кишини яхши кўриши мумкин? Мен меҳримни иккига бўла олмайман, аёлимни яхши кўраман. Иккинчи аёлга уйланганида нафақат уни моддий томондан таъминлаш керак, балки унга ҳам меҳр бериш керак. Адолатни таъминлаш қийин бўлади. Мен икки аёлни бирдек яхши кўра олмайман”, — деган эди Самандар Ҳамроқулов.