Hozirgi kunda har bir inson ijtimoiy tarmoqlardan foydalanadi. Unda yaqinlaringiz bilan istagancha suhbatlashish, rasmlar va videolar yuborish mumkin. Bu holatdan kelib chiqib, dunyodagi barcha insonlar ijtimoiy tarmoqlardan foydalanadi, deb xulosa qilish xato. Mashhur insonlar orasida ijtimoiy tarmoqlardan foydalanmaydiganlari ham bor. Masalan, Gollivud yulduzi Skarlett Yoxansson ijtimoiy tarmoqlardan foydalanmaydi.
Aktrisa ijtimoiy tarmoqlarga qaram bo‘lib qolgani haqida so‘zlab bergan. Skarlett telefonni qo‘liga olganida, real hayotni esdan chiqarib qo‘yadi. U ijtimoiy tarmoqlardagi kontentni va do‘stlarining bloglarini o‘qishni yaxshi ko‘radi, biroq bu muammo. Ijtimoiy tarmoqlar Yoxanssonni o‘ziga qaram qilib qo‘yadi. Keyin aktrisada o‘zini ayblash tuyg‘usi paydo bo‘ladi, chunki u vaqtini behudaga sarflagandek his qiladi.
“Onamning telefonini qo‘limga olganimda, uch yoshli bolaga o‘xshab qolaman. Shuning uchun ijtimoiy tarmoqlardan foydalana olmayman”, — deydi aktrisa.
Aktrisaning muxlislari o‘z kumirini kino olamidan tashqarida ko‘ra olmasligidan xavotirda. Ular haqiqatan ham Yoxanssonning kunni qanday o‘tkazishini, nonushtaga nima pishirishini yoki qanday obrazda bo‘lishini bilishni xohlaydi. Biroq aktrisa yetarlicha mashhurlikka ega va u shaxsiy hayotini ortiqcha e’tibordan himoya qilishga harakat qiladi.
“Insonlar mening shaxsiy hayotimga kamroq kirishini afzal ko‘raman. Agar hammasi shunday ketsa, baxtli ayol bo‘laman. Aktyor bo‘lishingiz va filmlarda rol o‘ynashingiz shaxsiy hayotingizga haqqingiz yo‘q degani emas”, — deydi Skarlett Yoxansson.
Aktrisa o‘zining juda ta’sirchan va “egosi juda nozik” inson ekanini aytgan. Ijtimoiy tarmoqlardagi har qanday post Yoxanssonni xavotirga solishi mumkin. Ijtimoiy tarmoqlarda salbiy izoh yozuvchi insonlar ham unga ta’sir o‘tkazishi mumkin va bunday holatda o‘zingizni ulardan himoya qilish eng to‘g‘ri qaror.
Aktrisa ijtimoiy tarmoqlarning ijobiy tomonlarini ham inkor etmaydi. Uning fikricha, ijtimoiy tarmoqlar jamiyatdagi insonlarni birlashtirish, ijtimoiy ahamiyatga ega ma’lumotlarni uzatish va global muammolarni hal qilishning eng samarali vositalaridir. Biroq aktrisa turli moda tendensiyalari, memlar va shov-shuvli yangiliklardan boxabar bo‘lmayotganidan xafa emasligini aytgan.
“Men ko‘p narsalarni qo‘ldan boy berayotgan bo‘lsam kerak. Biroq menda hech qachon ijtimoiy tarmoqlar bo‘lmagan, shuning uchun hammasini sog‘indim deb ayta olmayman”, — deydi aktrisa.
Izoh (0)