“Respublikaning turizm salohiyatini jadal rivojlantirish hamda mahalliy va xorijiy turistlar sonini yanada oshirishga doir qo‘shimcha chora-tadbirlar to‘g‘risida”gi prezident qarori qabul qilindi.
Qarorga muvofiq Transport vazirligi bir hafta muddatda “Samarqand” xalqaro aeroportida joriy etilgan “Ochiq osmon” rejimi doirasida xorijiy aviakompaniyalar uchun reyslar va yo‘nalishlarga bo‘lgan cheklovlarni olib tashlaydi hamda “beshinchi havo erkinligi”ni qo‘llaydi, shuningdek, xorijiy davlatlarning aviatsiya maʼmuriyatlari, chet el aviatashuvchilarini bu haqda belgilangan tartibda xabardor qiladi.
2023-yil 1-maydan Uzbekistan Airports AJ bilan birgalikda Farg‘ona, Namangan yoki Andijondan Buxoro, Samarqand, Termiz, Urganchga, shuningdek, Termiz—Nukus, Samarqand—Urganch, Buxoro—Urganch, Farg‘ona—Urganch kabi yo‘nalishlar bo‘yicha muntazam aviareyslar yo‘lga qo‘yiladi.
Shuningdek, Toshkentdan Nukus, Urganch, Buxoro, Qarshi va Samarqandga aviaqatnovlar yo‘lga qo‘yilib, amaldagidan ikki baravargacha arzon tariflarni joriy etiladi. Yangi tashkil etilgan rezident aviakompaniyalarga xorijiy yo‘nalishlarda parvozlarni amalga oshirish uchun kvotalarning ajratilishi taʼminlanadi.
Bir oy muddatda Tashqi ishlar vazirligi bilan birgalikda ushbu qarordan kelib chiqib, xalqaro shartnomalarga yangi tashkil etilgan rezident aviakompaniyalarga xorijiy va xalqaro yo‘nalishlarda parvozlarni amalga oshirish uchun kvotalar ajratish bo‘yicha o‘zgartirishlar kiritish hamda parvozlarni amalga oshirishga ruxsat berish choralari ko‘riladi.
2023-yil 1-oktabrga qadar Urganch va Buxoro aeroportlarining har biri bo‘yicha davlat-xususiy sheriklik shartlari asosida modernizatsiya qilish va boshqaruvga berish bo‘yicha alohida tanlovlar eʼlon qiladi. 2023-yil yakuniga qadar esa Namangan aeroportini davlat-xususiy sheriklik shartlari asosida modernizatsiya qilinadi hamda boshqaruvga berish bo‘yicha loyiha konsepsiyasi va texnik-iqtisodiy asoslari ishlab chiqiladi.
Mart oxirlarida prezident ishtirokida o‘tkazilgan yig‘ilishda fuqarolik aviatsiyasi rahbarlariga yil yakuniga qadar 20 ta qo‘shimcha zamonaviy samolyotlarni olib kelib, milliy aviatsiya parkini 64 taga yetkazish vazifasi qo‘yilgandi. Shuningdek, viloyatlararo yangi aviaqatnovlar uchun chipta xarajatlarining 25 foiziga subsidiya berilishi ma’lum bo‘lgan edi.
10-apreldan esa xavfsizlik choralarini ko‘rib, “Qamchiq” dovoni orqali turistik mikroavtobus (15 kishigacha), Jizzax dovoni, Chimyon va Chorvoqda turistik avtobus va mikroavtobuslar qatnovini yo‘lga qo‘yishga ruxsat berilgan.
Izoh (0)