Kiyev uzra boshqaruvni yo‘qotgan Bayraktar urib tushirildi (video)

Ukraina Havo kuchlari qo‘mondonligi 4-may kuni kechasi Kiyev uzra o‘zlariga tegishli “Bayraktar” dronini urib tushirdi.

Qo‘mondonlik ma’lumotlariga ko‘ra, dron rejali parvozni amalga oshirayotgan bo‘lgan va birdan boshqaruvni yo‘qotgan.

“Boshqaruvni yo‘qotgan uchuvchisiz boshqariladigan uchish apparatining poytaxt osmonida qolishi noxush holatlarga olib kelishi mumkinligi sabab mobil o‘t ochish guruhlari hisob-kitoblaridan foydalanishga qaror qilindi. Nishon yakson etildi! Afsusdamiz, lekin bu texnika, bunday holatlar bo‘lib turadi. Aftidan, muammo texnik nosozlikda, sabablari aniqlanmoqada”, — deyiladi xabarda.

Qo‘mondonlikning ta’kidlashicha, qurbonlar va jabrlanganlar yo‘q.

Kiyev meri Vitaliy Klichko dron qoldiqlarining qulashi oqibatida Solomensk tumanida yong‘in yuzaga kelganini ma’lum qildi. U yerda to‘rt qavatli savdo markazida yong‘in chiqqan.

“Uchuvchisiz uchish apparatining yo‘q qilinishi natijasida yuzaga kelgan portlash to‘lqini binoning tashqi dekorativ elementlari hamda 150 metr kvadrat maydondagi oynalarga zarar yetkazdi. Asosiy konstruksiyaga shikast yetmagan. Jabrlanganlar yo‘q”, — deb yozadi Klichko.

Rossiya hukumati 3-may kuni Kremlga ikkita dron hujum qilgani to‘g‘risida xabar bergandi. Vladimir Putin matbuot xizmati sodir bo‘lgan voqeani “prezidentga suiqasd” deb atadi, biroq uning kechasi Kremlda bo‘lishi ehtimolligi juda kam. BBC Kremlga uyushtirilgan hujum bo‘yicha rasmiy versiya e’lon qilinganidan keyin ham javobsiz qolayotgan savollarga to‘xtalib o‘tdi.