Senatning qirqinchi yalpi majlisida “Xalqaro mehnat tashkilotining xodimlarni ish joyidagi havoning ifloslanishi, shovqin va tebranishlar tufayli yuzaga keladigan kasbiy xavf-xatardan himoya qilish to‘g‘risidagi 148-sonli Konvensiyasini ratifikatsiya qilish haqida”gi qonun ko‘rib chiqildi. Bu haqda parlament yuqori palatasi matbuot xizmati xabar berdi.
Konvensiyaning asosiy maqsadi milliy qonunchilik yoki me‘yoriy hujjatlar orqali ish joyidagi havoning ifloslanishi, shovqin va tebranishlar tufayli kasbiy xavf-xatarlarning oldini olish va cheklashga qaratilgan chora-tadbirlarni belgilashdan iborat.
Senatorlar tomonidan Konvensiyani ratifikatsiya qilishda tizimli nazorat choralari, shu jumladan, ish joylarida mehnat sharoitlarini, zararli va xavfli ishlab chiqarish omillarini, mehnat jarayonlarining og‘irligi va tig‘izligi hamda asbob-uskunalarning jarohatlash xavfliligini baholash belgilangani ta‘kidlangan.
“Xalqaro mehnat tashkilotining mazkur konvensiyasi bu kabi standartlarni tatbiq etish uchun qo‘shimcha imkoniyatlarni ham yaratadi. Konvensiyaning ratifikatsiya qilish bilan birga, albatta tegishli milliy qonunchilik xujjatlarimizni ham ushbu Konvensiyaga implementatsiya qilishimiz zarur”, — degan Senat raisi Tanzila Narbayeva.
Muhokama jarayonida Konvensiyaning ratifikatsiya qilinishi xodimlar huquqlarini himoya qilishning qo‘shimcha kafolatlarini yaratish imkonini berishi va mehnatni muhofaza qilish milliy tizimini yanada takomillashtirishga sezilarli turtki berishi qayd etilgan.
Ushbu Konvensiya jahonning 47 ta davlati tomonidan ratifikatsiya qilingan.
Senatorlar Konvensiyaning ratifikatsiya qilinishi milliy qonunchilikni takomillashtirishga, mehnatni muhofaza qilish va xavfsizlik bo‘yicha xalqaro standartlarning samarali joriy etilishini ta‘minlashga xizmat qilishini, shuningdek, O‘zbekistonning xodimlar huquqlari kafolatlarini ta‘minlash bo‘yicha asosiy xalqaro tamoyil va standartlarga sodiqligini namoyish etishini ta‘kidlagan. Muhokama yakunida qonun senatorlar tomonidan ma‘qullangan.
Senat 3-may kuni bo‘lib o‘tgan yalpi majlisda tadbirkorlar hisobvaraqlaridagi pulni ularning roziligisiz olib qo‘yganlik uchun ma’muriy va jinoiy javobgarlik belgilangan qonun ma’qullangan edi.
Izoh (0)