Сенатнинг қирқинчи ялпи мажлисида “Халқаро меҳнат ташкилотининг ходимларни иш жойидаги ҳавонинг ифлосланиши, шовқин ва тебранишлар туфайли юзага келадиган касбий хавф-хатардан ҳимоя қилиш тўғрисидаги 148-сонли Конвенциясини ратификация қилиш ҳақида”ги қонун кўриб чиқилди. Бу ҳақда парламент юқори палатаси матбуот хизмати хабар берди.
Конвенциянинг асосий мақсади миллий қонунчилик ёки меъёрий ҳужжатлар орқали иш жойидаги ҳавонинг ифлосланиши, шовқин ва тебранишлар туфайли касбий хавф-хатарларнинг олдини олиш ва чеклашга қаратилган чора-тадбирларни белгилашдан иборат.
Сенаторлар томонидан Конвенцияни ратификация қилишда тизимли назорат чоралари, шу жумладан, иш жойларида меҳнат шароитларини, зарарли ва хавфли ишлаб чиқариш омилларини, меҳнат жараёнларининг оғирлиги ва тиғизлиги ҳамда асбоб-ускуналарнинг жароҳатлаш хавфлилигини баҳолаш белгилангани таъкидланган.
“Халқаро меҳнат ташкилотининг мазкур конвенцияси бу каби стандартларни татбиқ этиш учун қўшимча имкониятларни ҳам яратади. Конвенциянинг ратификация қилиш билан бирга, албатта тегишли миллий қонунчилик хужжатларимизни ҳам ушбу Конвенцияга имплементация қилишимиз зарур”, — деган Сенат раиси Танзила Нарбаева.
Муҳокама жараёнида Конвенциянинг ратификация қилиниши ходимлар ҳуқуқларини ҳимоя қилишнинг қўшимча кафолатларини яратиш имконини бериши ва меҳнатни муҳофаза қилиш миллий тизимини янада такомиллаштиришга сезиларли туртки бериши қайд этилган.
Ушбу Конвенция жаҳоннинг 47 та давлати томонидан ратификация қилинган.
Сенаторлар Конвенциянинг ратификация қилиниши миллий қонунчиликни такомиллаштиришга, меҳнатни муҳофаза қилиш ва хавфсизлик бўйича халқаро стандартларнинг самарали жорий этилишини таъминлашга хизмат қилишини, шунингдек, Ўзбекистоннинг ходимлар ҳуқуқлари кафолатларини таъминлаш бўйича асосий халқаро тамойил ва стандартларга содиқлигини намойиш этишини таъкидлаган. Муҳокама якунида қонун сенаторлар томонидан маъқулланган.
Сенат 3 май куни бўлиб ўтган ялпи мажлисда тадбиркорлар ҳисобварақларидаги пулни уларнинг розилигисиз олиб қўйганлик учун маъмурий ва жиноий жавобгарлик белгиланган қонун маъқулланган эди.
Изоҳ (0)