Farg‘ona viloyati Buvayda tumanida sodir bo‘lgan yo‘l-transport hodisasi oqibatida ikki bola jarohat oldi, deb xabar beradi viloyati IIB axborot xizmati.
Ma’lum qilinishicha, 2023-yil 27-mart kuni voyaga yetmagan I.Sh. Nexia-3 rusumli avtomashinada tumanning “Bachqir” qishlog‘i hududida harakatlanib borayotib, boshqaruvni yo‘qotishi oqibatida yo‘l chetida harakatlanib kelayotgan piyodalarni urib yuborgan.
Shuningdek, mazkur transport vositasi yo‘l chetida to‘xtab turgan fuqaro T.U.ga tegishli Nexia-3 rusumli avtomashinaga borib urilib, yo‘l-transport hodisasi sodir etgan.
Sud tibbiy ekspertizasining 6-apreldagi xulosasida piyoda T.I. yopiq kalla miya jarohati, bosh ensa suyagi sinishi, ensa sohasining ezilib yirtilishi kabi hayot uchun xavfli, og‘ir tan jarohati olgani ko‘rsatilgan.
Hodisa oqibatida har ikkala Nexia-3 avtomashinalari ham turli darajada shikastlangan.
Mazkur holat yuzasidan Buvayda tumani IIB huzuridagi tergov bo‘limi tomonidan voyaga yetmagan Sh.I.ga nisbatan Jinoyat kodeksining 266-moddasi 1-qismi bilan jinoyat ishi qo‘zg‘atilgan. Ish hujjatlari sud organiga yuborilgan hamda tuman prokuraturasi tomonidan jinoyat ishi doirasida fuqaro T.U.ning avtomashinasiga yetkazilgan 24,336 million so‘m miqdoridagi zararni undirish borasida daʼvo arizasi kiritilgan.
Piyodalar bilan bog‘liq yo‘l-transport hodisalari
Yanvar boshlarida Toshkent viloyatida “Jiguli” yo‘l chetidagi ikki kishini urib yuborishi oqibatida, ular vafot etgandi. Shuningdek, Farg‘ona viloyatida ham 2 piyoda o‘limi bilan bog‘liq yo‘l-transport hodisalari sodir bo‘lgan edi. Samarqandda Damas urib yuborgan ikki nafar piyoda shifoxonada vafot etgan, Toshkentda Lacetti piyodalar o‘tish joyidan o‘tayotgan 47 yoshli ayolni urib yuborgandi.
Izoh (0)