Ayni paytda O‘zbekiston Markaziy banki Boshqaruvining yig‘ilishi o‘tkazilmoqda. Unda asosiy stavkani yillik 14 foiz darajasida o‘zgarishsiz qoldirish to‘g‘risida qaror qabul qilindi.
Ma’lum qilinishicha, mamlakatda yillik inflyatsiya darajasi mart va aprel oylarida ham pasayishda davom etgan hamda mos ravishda 11,7 va 11 foizga teng bo‘lgan. Ushbu pasayishda mavsumiy omillar va o‘tgan yildagi yuqori baza effekti ham muhim ahamiyat kasb etgan.
Inflyatsiyaning uzoq muddatli va barqaror omillarini ifoda etuvchi bazaviy inflyatsiyada ham mart oyida sezilarli pasayish dinamikasi kuzatilib, yillik 12,9 foizgacha sekinlashgan (2022-yil dekabr oyida 13,8 foiz). Bunda, bazaviy inflyatsiyaning umumiy inflyatsiyaga hissasi o‘tgan yilning oktabr oyidan buyon birinchi marta 10 foiz banddan kamroqni tashkil etgan.
Yil yakuni bo‘yicha inflyatsiya darajasining prognoz diapazoni 8,5-9,5 foiz darajasida o‘zgarishsiz qoldirilgan. Inflyatsion kutilmalar dinamikasi, pul bozoridagi nisbatan qatʼiy pul-kredit sharoitlari, asosiy mahsulotlar taklifi bo‘yicha vaziyatning barqarorlashib borayotganligi, inflyatsiyaning mazkur prognoz koridori o‘rtasida shakllanishi bo‘yicha ishonchni oshirmoqda.
“Markaziy bank pul-kredit sharoitlarining yalpi talab, narxlar darajasi va inflyatsion kutilmalarga taʼsirini baholashda davom etadi. Bunda, qabul qilinayotgan qarorlar inflyatsiyaning prognoz koridori doirasida shakllanishini taʼminlashga qaratiladi”, — deyiladi xabarda.
Markaziy bank mart oyida asosiy stavkani 1 foizga pasaytirib, yillik 14 foiz darajasida belgilagan edi.
2018-yil boshida yillik stavka 14 foiz etib tasdiqlangandi. 2019-yilda ushbu stavka 16 foizgacha ko‘tarilgan. 2020-yil mart oyida ham bazaviy stavka o‘zgarishsiz qoldirilib, 16 foiz deb belgilangandi. Markaziy bank boshqaruvining 2020-yil 14-apreldagi qarori bilan asosiy stavka 1 foizga pasaytirilib, yillik 15 foiz darajasida belgilangan.
Iyun oyida esa Markaziy bank asosiy stavkani pasaytirishi haqida xabarlar tarqaldi, biroq 11-iyun kuni asosiy stavka bo‘yicha qaror qabul qilingan va u 15 foiz miqdorida o‘zgarishsiz qoldirilgandi. 2022-yil 17-mart kuni Markaziy bankning yig‘ilishida asosiy stavkani oshirish bo‘yicha qaror qabul qilib, 17 foiz etib belgilandi, oradan bir yil o‘tgach, 2022-yilning 9-iyun kuni Markaziy bank asosiy stavkani 1 foizga tushirgan edi.
Izoh (0)