O‘zbekistonda bir qator qonunlarga o‘zgartish va qo‘shimchalar kiritilib, fuqarolar yig‘ini raisi lavozimiga nisbatan qo‘llanilayotgan oqsoqol tushunchasi olib tashlanmoqda. Bu haqda Senatning 4-may kuni bo‘lib o‘tgan yalpi majlisida maʼlum qilindi.
Senat majlisida O‘zbekistonning ayrim qonun hujjatlariga o‘zgartish va qo‘shimchalar kiritishga doir qonun muhokama qilindi. Hujjatda fuqarolar yig‘ini raisi lavozimiga nisbatan qo‘llanilayotgan oqsoqol tushunchasidan voz kechish bandi ham ilgari surilgan.
Senat qo‘mitasi raisi Narimon Umarovning aytishicha, respublikada uzoq yillardan beri mahalla raislari oqsoqol deb nomlanib kelgan. Biroq hozirgi vaziyat boshqacha.
“Avallari qishloq va mahalla fuqarolar yig‘inlari raislari lavozimiga asosan yoshi ulug‘ insonlar nomzodi ilgari surilgan. Shu sababli, sohani tartibga soluvchi qonunlarga ham oqsoqol tushunchasi kiritilgan edi. Biroq, hammamizga maʼlumki, yurtimizda xotin-qizlar hamda yoshlarni jamiyat va davlat hayotidagi ishtiroki tobora ortib bormoqda. Natijada fuqarolar yig‘ini raisi lavozimlarida ko‘plab xotin-qizlar va yoshlar faoliyat yuritib kelyapti. Bu esa fuqarolar raisi lavozimiga nisbatan oqsoqol tushunchasining qo‘llanilishi mantiqan noto‘g‘ri ekanini ko‘rsatmoqda”, — dedi senator.
Maʼlum qilinishicha, mazkur qonun asosida bir qator qonunlarga o‘zgartish va qo‘shimchalar kiritilib, fuqarolar yig‘ini raisi lavozimiga nisbatan qo‘llanilayotgan oqsoqol tushunchasi chiqarilmoqda. Majlisda senatorlar qonunni bir ovozdan maʼqulladi.
Izoh (0)