Айни пайтда Ўзбекистон Марказий банки Бошқарувининг йиғилиши ўтказилмоқда. Унда асосий ставкани йиллик 14 фоиз даражасида ўзгаришсиз қолдириш тўғрисида қарор қабул қилинди.
Маълум қилинишича, мамлакатда йиллик инфляция даражаси март ва апрель ойларида ҳам пасайишда давом этган ҳамда мос равишда 11,7 ва 11 фоизга тенг бўлган. Ушбу пасайишда мавсумий омиллар ва ўтган йилдаги юқори база эффекти ҳам муҳим аҳамият касб этган.
Инфляциянинг узоқ муддатли ва барқарор омилларини ифода этувчи базавий инфляцияда ҳам март ойида сезиларли пасайиш динамикаси кузатилиб, йиллик 12,9 фоизгача секинлашган (2022 йил декабрь ойида 13,8 фоиз). Бунда, базавий инфляциянинг умумий инфляцияга ҳиссаси ўтган йилнинг октябрь ойидан буён биринчи марта 10 фоиз банддан камроқни ташкил этган.
Йил якуни бўйича инфляция даражасининг прогноз диапазони 8,5-9,5 фоиз даражасида ўзгаришсиз қолдирилган. Инфляцион кутилмалар динамикаси, пул бозоридаги нисбатан қатъий пул-кредит шароитлари, асосий маҳсулотлар таклифи бўйича вазиятнинг барқарорлашиб бораётганлиги, инфляциянинг мазкур прогноз коридори ўртасида шаклланиши бўйича ишончни оширмоқда.
“Марказий банк пул-кредит шароитларининг ялпи талаб, нархлар даражаси ва инфляцион кутилмаларга таъсирини баҳолашда давом этади. Бунда, қабул қилинаётган қарорлар инфляциянинг прогноз коридори доирасида шаклланишини таъминлашга қаратилади”, — дейилади хабарда.
Марказий банк март ойида асосий ставкани 1 фоизга пасайтириб, йиллик 14 фоиз даражасида белгилаган эди.
2018 йил бошида йиллик ставка 14 фоиз этиб тасдиқланганди. 2019 йилда ушбу ставка 16 фоизгача кўтарилган. 2020 йил март ойида ҳам базавий ставка ўзгаришсиз қолдирилиб, 16 фоиз деб белгиланганди. Марказий банк бошқарувининг 2020 йил 14 апрелдаги қарори билан асосий ставка 1 фоизга пасайтирилиб, йиллик 15 фоиз даражасида белгиланган.
Июнь ойида эса Марказий банк асосий ставкани пасайтириши ҳақида хабарлар тарқалди, бироқ 11 июнь куни асосий ставка бўйича қарор қабул қилинган ва у 15 фоиз миқдорида ўзгаришсиз қолдирилганди. 2022 йил 17 март куни Марказий банкнинг йиғилишида асосий ставкани ошириш бўйича қарор қабул қилиб, 17 фоиз этиб белгиланди, орадан бир йил ўтгач, 2022 йилнинг 9 июнь куни Марказий банк асосий ставкани 1 фоизга туширган эди.
Изоҳ (0)