Bosh vazir o‘rinbosari — iqtisodiy taraqqiyot va kambag‘allikni qisqartirish vaziri Jamshid Qo‘chqorov O‘zbekiston Prezidenti tomonidan YaIMni 2 foizga va undan sal ko‘proq o‘stirish vazifasi qo‘yilganini ma’lum qildi. Bu haqda u “Axborot 24” kanaliga bergan intervyusida so‘zlab bergan.
“Bugungi vaziyatda moliyaviy va budjet barqarorligi bor. Prezidentning o‘zlari budjet barqarorligini, daromadlar tushishini nazoratda ushlaganlari sababli bugun budjetning hamma majburiyatlari aholi oldida ham, tashkilotlar oldida ham bajarib kelinmoqda”, — deydi Jamshid Qo‘chqorov.
Shuningdek, bosh vazir o‘rinbosarining ta’kidlashicha, sanoat o‘sishini 3,5 foizga oshirish belgilangan. Bu, avvalo, karantin paytida to‘xtab qolgan faoliyatini yo‘lga qo‘yish, ularni aylanma mablag‘lar bilan ta’minlash, foizlarni ko‘rib chiqish hisobidan amalga oshiriladi.
“Yaqin kunlarda Markaziy bank boshqaruvi kengashi bu qarorni qabul qiladi. Prezident Markaziy bank taklifini ma’qullagan. Foizlar birmuncha pasayishini ko‘ramiz”, — deydi Qo‘chqorov.
Ta’kidlanishicha, shu kabi omillar sanoatni 3,5 foizga o‘stirish imkonini beradi. Ma’lumotlarga ko‘ra, Markaziy bank boshqaruvining navbatdagi yig‘ilishi 11-iyunga belgilangan.
Eslatib o‘tamiz, O‘zbekistonda oxirgi marta 14-aprelda asosiy stavka yillik 15 foiz darajasida belgilangan edi.
Izoh (0)