Xerson viloyati 3-may kuni Rossiya armiyasi tomonidan o‘qqa tutilishi oqibatida 21 kishi halok bo‘ldi, yana 48 kishi jarohatlandi. Ukraina prezidenti Vladimir Zelenskiy ma’lum qildi.
Halok bo‘lganlarning barchasi tinch aholi ekani aytilmoqda. Ukraina Bosh prokuraturasi ma’lumotlariga ko‘ra, rossiyalik harbiylar “tartibsiz” o‘qqa tutishni amalga oshirgan, snaryadlar fuqarolik infratuzilmalariga, jumladan, mahalliy “ATB” supermarket va vokzalga kelib tushgan.
“Temiryo‘l vokzali va kesib o‘tish yo‘li, uy, qurilish do‘koni, oziq-ovqat supermarket, avtozapravka — bu joylarni nima birlashtirib turishini bilasizmi? Rossiya o‘z snaryadlari bilan tinch aholini o‘ldirgan holda qoldirayotgan qonli iz”, — degan Zelenskiy.
Shuningdek, ma’lum qilinishicha, Xerson viloyatidagi bir nechta aholi punkti ham o‘qqa tutilgan. Xersonda jami 16 kishi halok bo‘lgan. Bosh prokuratura urush qonunlari va odatlarini buzish moddasi bo‘yicha sudgacha tergov boshlagan.
Rossiya Ukrainaga keng ko‘lamli bosqinining boshidayoq Xersonni egallab olgan. 2022-yil noyabrda Rossiya mudofaa vaziri Sergey Shoygu qo‘shinlarga shahardan Dneprning chap qirg‘og‘iga chekinishni buyurgan. Rossiya hukumati o‘shanda o‘z qarorini “harbiy zarurat” deya izohlagandi. Chekinishi bilan ular shaharni muntazam o‘qqa tutishni boshlagan.
Izoh (0)