Россия Ташқи ишлар вазири расмий вакили Мария Захарова Ўзбекистонда Конституция ислоҳоти бўйича умумхалқ референдуми ўтказилгани юзасидан баёнот берди.
Ўзбекистонда 30 апрель куни “Ўзбекистон Республикасининг Конституцияси тўғрисида”ги Конституциявий қонуннинг қабул қилиши бўйича референдум ўтказилди.
МДҲ, ШҲТ, МДҲнинг парламентлараро ассамблеяси, ЕХҲТ Демократик институтлар ва инсон ҳуқуқлари бўйича бюроси ва бошқа бирлашмаларнинг мониторинг миссияси таркибида фаол ишлаган россиялик кузатувчиларнинг баҳолашича, овоз бериш жараёнлари очиқ характерга эга бўлган, тинч муҳитда ўтказилган. “Республика ҳукумати референдум халқаро нормалар ва умумэътироф этилган демократик тамойилларга тўла мос ҳолда ўтказиш учун барча шарт-шароит яратди”, — дея таъкидланади баёнотда.
Қайд этилишича, референдум натижалари Ўзбекистон жамияти томонидан президент Шавкат Мирзиёевнинг сиёсий йўналиши юксак даражада қўллаб-қувватланаётганини яққол кўрсатган.
“Ўзбекистонда конституциявий референдумнинг муваффақиятли ўтказилишини мамлакат сиёсий тараққиётидаги муҳим босқич сифатида олқишлаймиз. Биз Россия—Ўзбекистон кўп қиррали стратегик шериклик ва иттифоқчилик муносабатларини янада мустаҳкамлаш борасидаги принципиал ниятимизни яна бир бор тасдиқлаймиз”, — дейилади баёнотда.
Референдумда Конституция тўғрисидаги Конституциявий қонунни қабул қиласизми деган саволга 19 миллион 722 минг 809 нафар фуқародан 15 миллион 40 минг 55 нафари (90,21 фоизи) ёқлаб, 1,5 миллион нафари қарши овоз берди. “Ўзбекистон Республикасининг референдуми тўғрисида”ги қонуннинг 38-моддасига кўра, овоз беришда иштирок этган фуқароларнинг ярмидан кўпроғи ёқлаб овоз берган бўлса, қарор референдумда қабул қилинган деб топилади.
Изоҳ (0)