Toshkent shahri va Farg‘ona viloyatida aksiz markasiz tamaki va alkogol mahsulotlari savdosi to‘xtatib qolindi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, holatlardan biri Bosh prokuratura huzuridagi departamentning Sergeli tuman bo‘limi tomonidan o‘tkazilgan tezkor tadbirda aniqlangan. Fuqarolar N.T. va J.X. Yangi Sergeli ko‘chasida tegishli hujjatlari bo‘lmagan 10 turdagi aksiz markasiz tamaki mahsulotlarini fuqaro A.A.ga jami 40,4 million so‘mga sotgan vaqtlarida ashyoviy dalillar bilan ushlangan.
Xuddi shunday, departamentning Farg‘ona viloyat boshqarmasi tomonidan o‘tkazilgan tezkor tadbirda Toshkent—Andijon yo‘nalishida harakatlanib kelayotgan Damasʼda fuqaro A.K. tegishli hujjatlari bo‘lmagan 36 turdagi xorijda ishlab chiqarilgan 387 dona alkogol mahsulotini Andijon shahrida o‘tkazish maqsadida olib ketayotgani aniqlanib, ashyoviy dalil sifatida olingan.
Mazkur holatlar yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)