Тошкент шаҳри ва Фарғона вилоятида акциз маркасиз тамаки ва алкогол маҳсулотлари савдоси тўхтатиб қолинди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, ҳолатлардан бири Бош прокуратура ҳузуридаги департаментнинг Сергели туман бўлими томонидан ўтказилган тезкор тадбирда аниқланган. Фуқаролар Н.Т. ва Ж.Х. Янги Сергели кўчасида тегишли ҳужжатлари бўлмаган 10 турдаги акциз маркасиз тамаки маҳсулотларини фуқаро А.А.га жами 40,4 миллион сўмга сотган вақтларида ашёвий далиллар билан ушланган.
Худди шундай, департаментнинг Фарғона вилоят бошқармаси томонидан ўтказилган тезкор тадбирда Тошкент—Андижон йўналишида ҳаракатланиб келаётган Damasъда фуқаро А.К. тегишли ҳужжатлари бўлмаган 36 турдаги хорижда ишлаб чиқарилган 387 дона алкогол маҳсулотини Андижон шаҳрида ўтказиш мақсадида олиб кетаётгани аниқланиб, ашёвий далил сифатида олинган.
Мазкур ҳолатлар юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)