Toshkent shahrida elektrobuslarni quvvatlovchi stansiyalar yetishmayotgani haqida tanqidiy post e’lon qilindi. “Toshshahartransxizmat” holat yuzasidan munosabat bildirdi.
Qayd etilishicha, jamoat transporti uchun olib kelinayotgan avtobus va elektrobuslarni avtobus saroylarida taqsimlash, ularni saqlash, xavfsiz harakatlanishini, sifatli texnik xizmat ko‘rsatilishini ta’minlash maqsadida avtobus saroylarini qayta rekonstruksiya qilish dasturi ishlab chiqilib, joriy yilning mart oyidan boshlab avtobus saroylarida modernizatsiyalash ishlari olib borilmoqda.
Jumladan, xarid qilinayotgan elektrobuslarni quvvatlash uchun yetarli miqdordagi energiya resurslari bilan ta’minlash maqsadida, barcha avtobus saroylari hududida quvvatlash uskunalari qurib ishga tushirilmoqda.
Dasturga asosan, 1-avtobus saroyi filialida 22 ta, 4-avtobus saroyi filialida 20 ta, 7-avtobus saroyi filialida 28 ta, 8-avtobus saroyi filialida 30 ta, 18-avtobus saroyi filialida 18 ta, 5-avtobus saroyi filialida 20 ta elektr stansiyalarini qurish belgilangan.
Hozirgi kunda jamiyatning 8-Avtobus saroyi filialida 30 ta va 7-avtobus saroyi filialida 28 ta elektr stansiyalari to‘liq ishga tushirilgan bo‘lib, ushbu stansiyalar elektrobuslarni 4-5 soat davomida to‘liq quvvatlash imkoniyatini bermoqda. Tez kunlarda avtobus saroylari hududida qurilayotgan 80 ta elektr quvvatlash stansiyalari foydalanishga topshirilishi belgilangan.
Izoh (0)