Jizzax viloyati bandlik bosh boshqarmasi mansabdori qalbaki sertifikatni 1 million 100 ming so‘mga sotayotgan vaqtida viloyat ichki ishlar organlari xodimlari tomonidan protsessual tartibda ushlandi. Bu haqda viloyat IIB axborot xizmati xabar berdi.
Xabarga ko‘ra, 1989-yilda Forish tumanida tug‘ilgan, Sharof Rashidov tumanida joylashgan “Olmachi” mahallasida yashovchi ushbu mansabdor bir ayolning ukasi nomiga kasb bo‘yicha mutaxassislikka egalik to‘g‘risida sertifikat yasab, sotishni taklif etgan. Ayol bu haqda viloyat IIOga murojaat qilib, unga nisbatan qonuniy chora ko‘rishni so‘ragan.
Mazkur ariza asosida ichki ishlar organlari tomonidan tezkor tadbir o‘tkazildi. Jarayonda aybdor o‘zi mehnat qilayotgan tashkilot oldida murojaatchiga qalbaki sertifikatni 1 million 100 ming so‘mga sotayotgan vaqtda daliliy ashyolar bilan ushlangan.
Tadbir davomida uning xonasi ko‘zdan kechirilganda 117 dona yozilmagan hamda 25 dona muhr bosilgan sertifikat blankalari, 8 dona tijorat banki sertifikati, ikki dona faxriy yorliq, ikki dona kompyuter, bir donadan printer va fleshkarta hamda bir dona qalbaki muhr hujjatlashtirib olingan.
Holat yuzasidan Jinoyat kodeksining 228-moddasi 1-qismi hamda 168-moddasi 3-qismi bilan jinoyat ishi qo‘zg‘atilgan.
Avvalroq Farg‘ona viloyati O‘zbekiston tumani hokimligida ishlovchi shaxs 4 ming dollar pora olayotgan vaqtda ushlangani xabar qilingan edi. Shuningdek, Buxoro viloyati Jondor tumanida mahalla fuqarolar yig‘ini raisi 400 ming so‘m bilan fuqaroni “temir daftar”ga kiritib qo‘ymoqchi bo‘lgani haqida xabar berilgandi.
Izoh (0)