O‘zbekiston Madaniyat va sanʼatni rivojlantirish jamg‘armasi tomonidan “O‘zbekistonning arxeologik xazinalari. Makedoniyalik Iskandardan to Kushonlar sulolasigacha” nomli yangi ko‘rgazma loyihasi taqdim etilmoqda.
Ushbu ko‘rgazma 2023-yilning 4-mayidan 2024-yilning 14-yanvariga qadar bo‘lib o‘tadi.
Arxeologik topilmalarga bag‘ishlangan va eramizdan avvalgi IV asrning ikkinchi yarmida makedoniyalik Iskandar hukmronligidan to milodiy IV asrdagi Kushonlar hukmronligining oxirigacha bo‘lgan davrni qamrab oluvchi ko‘rgazma ikki maskanda – Berlindagi Jeyms Simon galereyasi va Yangi muzeyida tashkil etiladi.
Madaniyat va sanʼatni rivojlantirish jamg‘armasida loyihalar menejeri Azizbek Mannopovning so‘zlariga ko‘ra, ushbu ko‘rgazma Aleksandr Makedonskiydan boshlab Kushonlargacha bo‘lgan davrni o‘z ichiga oladi.
“Tashrif buyuruvchilar O‘zbekistonning Samarqand, Buxoro, Toshkent, Termiz shaharlari va Qoraqalpog‘istonning Nukus shahri muzeylaridan keltirilgan 284 ta eksponatni bevosita tomosha qilishlari mumkin bo‘ladi. Jarayonga 1 yildan ortiq muddat tayyorgarlik ko‘rdik. Taʼkidlash kerakki, bunday yirik xalqaro tadbirlarning tashkiliy jarayonlari o‘ziga xos murakkablikdagi aniqlikni talab etadi. Muzeyga olib kelingan eksponatlarimizning barchasi “Nail-to-Nail” dasturi bo‘yicha sug‘urtalangan. Yaʼni muzeydan chiqib to qaytib borgunicha sug‘urta ishlaydi”, — deydi mutaxassis.
Madaniyat va sanʼatni rivojlantirish jamg‘armasi madaniy hamkorlik boshqarmasi boshlig‘i Bobur Sayomovning taʼkidlashicha, Fransiyaning Luvr muzeyidagi ko‘rgazma eramizning IV asrdan eramizning XVI asrigacha bo‘lgan kattaroq davrni o‘z ichiga olgan edi.
“Bu yerda esa eramizdan avvalgi IV asrdan eramizning IV asrigacha bo‘lgan davr chuqurroq ochib beriladi. Asosiy urg‘u Aleksandr Makedonskiy hamda Kushonlar davridagi arxeologik, madaniy topilmalarga beriladi.
Ko‘rgazmadagi har bir eksponat biz uchun qimmatli. Ularning orasida Xolchayondan topilgan shahzoda haykali, Dalvarzintepadan topilgan oltin xazinalari ommaga ilk bor namoyish etilayotgan juda ko‘plab nodir muzey ashyolari mavjud”, — deydi u.
Berlin davlat muzeylari ilmiy loyihalari bo‘yicha mutaxassis Manfred Navrotning aytishicha, ko‘rgazmaga borasidagi muzokaralar 2018-yil oxirida, Berlinda tarixiy buyumlarni yig‘ish vaqtda boshlangan.
“Ko‘rgazmaning o‘ziga xosligidan juda faxrlanamiz. O‘zbeksiton tomonidan 300 ga yaqin buyumlar taqdim etildi. Bu narsalarni biz birninchi marta ko‘rmoqdamiz, negaki necha yillar mobaynida mamlakat Germaniya uchun, butun Yevropa uchun yopiq edi”, — deya qo‘shimcha qiladi Manfred Navrot.
Izoh (0)