Qirg‘izistonda 2-may kuni soat 09:46 da 4,3 magnitudali zilzila sodir bo‘ldi. Zilzila kuchi O‘zbekiston hududlarida ham sezildi, deb xabar beradi Seysmoprognostik monitoring markazi.
Zilzila koordinatalari: 41,72 gradus shimoliy kenglik; 71,3 gradus sharqiy uzunlik. Magnituda М=4,3. Chuqurlik 10 kilometr. Zilzila epimarkazi Toshkentdan 205 kilometr janubiy-sharqda.
O‘zbekiston hududida sezilish kuchi:
- Yangiqo‘rg‘on tumanida — 2-3 ball;
- Kosonsoy tumanida — 2 ball.
Aprel o‘rtasida ham Qirg‘izistonda sodir bo‘lgan zilzila kuchi Andijon viloyatida sezilgandi. Undan bir necha kun oldin esa Qozog‘iston Favqulodda vaziyatlar vazirligi rahbari Yuriy Ilin Turkiyadagi vaziyat Qozog‘istonni seysmik xavfsizlik masalalariga alohida e’tibor qaratishga undaganini ta’kidlagan edi. Ilinning so‘zlariga ko‘ra, Qozog‘iston hududining 40 foizdan ortig‘i ushbu tabiiy ofatni boshdan kechirgan. FVV tizimiga o‘tkazilgan Seysmologiya instituti ko‘p yillar davomida deyarli moliyalashtirilmagan. 2023-yilda esa ushbu institut joylashgan Olmaotada zilzila xavfini batafsil tahlil qiladigan 30 dan ortiq stansiyalar o‘rnatiladi. Stansiyalar joriy yil oxirigacha Qozog‘iston prezidenti topshirig‘iga binoan mahalliy budjet hisobidan foydalanishga topshiriladi.
Izoh (0)