Toshkentda yangi avtobusni boshqarishda yo‘l qo‘yilgan kamchilik ortidan bir qancha xodimlar ishdan olindi

Toshkent shahrida yangi olib kelingan avtobusni boshqarishda yo‘l qo‘yilgan kamchilik ortidan bir qancha xodimlar ishdan olindi. “Toshshahartransxizmat” AJ axborot xizmati bu bo‘yicha maʼlumot taqdim etdi.

Xabarga ko‘ra, 1-may kuni “Toshshshahartransxizmat” AJ boshqaruv raisi, o‘rinbosarlari va avtobus saroyi rahbarlari ishtirokida, so‘nggi kunlarda jamoat transporti tizimida yo‘l qo‘yilayotgan kamchiliklar, ijtimoiy tarmoqlarda muhokamalarga sabab bo‘layotgan muammolarni bartaraf etish yuzasidan  tanqidiy muhokama yig‘ilishi o‘tkazildi. 

Yig‘ilishda o‘ziga biriktirilgan avtobusni ehtiyotsizlik bilan boshqargan avtobus haydovchisi T.N., shuningdek, o‘z xizmat vazifasiga masʼuliyatsizlik bilan yondashgani, avtobuslar harakatini xavfsiz tashkil etish choralarini ko‘rish bo‘yicha haydovchilar o‘rtasida yetarli darajada yo‘riqnoma o‘tkazib tushuntirish ishlarini olib bormagani, avtobuslardagi reklama bannerlarining joylashtirilishi va bartaraf etilishiga sovuqqonlik bilan yondashgani, hamda yo‘nalishlarga chiqariladigan avtobus va elektrobuslarning ish tartibini to‘g‘ri tashkil etmagani sababli avtobus saroyi masʼul xodimlariga qatʼiy chora ko‘rilib, xodimlar bilan tuzilgan mehnat shartnomasi bekor qilindi, hayfsan intizomiy chorasi ko‘rildi. Jumladan:

• 2-Avtobus saroyi filiali direktori o‘rinbosari va harakat xavfsizligini nazorat qilish bo‘limi boshlig‘i bilan tuzilgan mehnat shartnomasi bekor qilindi, filial direktoriga hayfsan intizomiy chorasi ko‘rildi;
• 1-Avtobus saroyi filiali direktori o‘rinbosari bilan tuzilgan mehnat shartnomasi bekor qilindi, filial direktoriga hayfsan intizomiy chorasi ko‘rildi.
• 7-Avtobus saroyi filiali direktori o‘rinbosariga hayfsan intizomiy chorasi ko‘rildi. Reklama joylashtirish bo‘yicha masʼul xodim bilan tuzilgan mehnat shartnomasi bekor qilindi.
• 1-, 2-, 5-, 7-, 8-, 12-, va 18-Avtobus saroyi filiallari bosh muhandislariga hayfsan intizomiy chorasi ko‘rildi.

Shuningdek, barcha avtobus saroyi rahbarlariga yo‘lovchilarni xavfsiz tashish va ularni o‘z manzilariga sog‘-omon yetkazib qo‘yish eng oliy maqsad ekanligi, yo‘lovchilar bilan xushmuoma bo‘lish, xizmat ko‘rsatish madaniyatini oshirish yuzasidan barcha haydovchilar o‘rtasida yana bir bor tushuntirish ishlari olib borilib, haydovchilar ustidan nazorat kuchaytirilishi yuzasidan qatʼiy topshiriqlar berib o‘tildi.