Иқтисодиёт соҳаси – барча мамлакатлар ривожи учун муҳим бўлган соҳалардан бири. Ушбу соҳани ўрганиш ва уни амалда қўллай билиш ҳар бир мамлакат тараққиётининг бир бўлаги ҳисобланади. Ушбу йўналиш бўйича хорижда ўқиётган ўзбекистонлик талабалар ҳам етарлича. Улардан бири – Германиянинг Трир университетида таҳсил олаётган Ҳамидулло Назруллаев.
Ватандошимиз “Дарё” мухбири билан суҳбатда Германияга келгани, ёшларга маслаҳатлари ва Ўзбекистонга қайтиши ҳақида гапирди.
“Андижон вилояти Балиқчи туманида катта бўлганман. Бошланғич таълимни ўша ерда олганман. Отам ёшлигимдан инглиз тили ва математика тўгаракларига олиб борганлар. Шундан кейин математика ва инглиз тилига жуда ҳам қизиқиш ортган. Ўшандан бери бу фанларни ўрганиб келаман. Кейинроқ баҳоларимни яхшилаб, шу фанлардан жиддий ўқиганман. 2018 йили Андижон машинасозлик институти иқтисодиёт йўналишига қабул қилиниб, у ерда бакалавр даражасини олганман.
Европадан Германия давлатини танлашимга сабаб – бу давлатнинг иқтисодий кўрсаткичларини инобатга олганман ва турли хил соҳаларда дунёда биринчи ўринда туриши қизиқ туюлган. Оилада ота-онам билан доим маслаҳатлашаман. Улар чет элда ўқиш фикримни қўллаб-қувватлашган. Асосан, отам менга мотивация бағишлаган. Ўқишга тайёрланиш чоғида кўп қийинчиликлар ва муваффақиятсизликлар бўлган. Ўша вақтларда ота-онам менга ишонишларини таъкидлаб келишган. Уларнинг дуолари туфайли шу даражагача етиб келганман.
Ўқишга топшириш муддати 6-7 ойни талаб қилган, чунки 2021 йил октябр ноябрь ойларида ўқишни бошлаганман. 6-7 университетга ҳужжат топшириб, бештасига грант асосида ўқишга қабул қилинганман. Ўқишга топшираётган вақтда асосан IELTS баҳоси 6,5-7 бўлиши, немис тилида ўқисак, B2 ёки C1 даража талаб этилади. Ўқиш давомида ёки битиргач, фаоллик ҳам инобатга олинади.
Германиянинг Трир шаҳрига илк маротаба 2021 йил 28-октябрда шаҳрига келганман. Асосий қийинчиликлар ўқиш жараёнида бўлди. Инсонлар билан танишиш ва янги дўстлар оттириш мақсадида университетдаги ҳар хил тадбир ва экскурсияларга қўшилганман. Халқаро талабалар билан танишиб, четдан ва Германиянинг турли шаҳарларидан бўлган талабалар билан танишиб, дўстлашганман. Келганимдаги иккинчи кундан бошлаб жуда кўплар дўстлар орттирганман.
Ҳар доим Германияга келганимда ўзбеклар бормикан деб қидирардим ва айнан юртдошларимиз кўмагида қийинчиликларни енгиб ўтганман. Германиядаги ўқиш харажатларини қоплаш учун ҳафта сўнгида турли ишларни бажараман. Қолган вақтда эса, асосан, ўқиш билан банд бўламан.
Ўзбекистондаги дўстларимизга энг камида иккита чет тилини ўрганишни маслаҳат бераман. Яна бир тавсиям, компьютер соҳасидаги билимларни ўрганиб боринг. Бундан ташқари, келажакда ўзингизга қизиқ бўлган соҳада ўқинг. Фақатгина пулни орқасидан қувиб эмас, ўзингиз севиб қиладиган соҳа бўйича таълим олиб, ишни олиб боринг.
Иқтисодиёт бўйича ўқиб, билимларимни оширар эканман, келгусида албатта Ватанимизга қайтиб, Ўзбекистон иқтисодиёти йўлида ҳисса қўшишга ҳаракат қиламан. Ҳали қилинадиган ишлар кўп, уларни хориж тажрибаси асосида қилиш лозим деб биламан ва олган билимларимизни Ўзбекистон ривожи йўлида ишлатамиз”.
Изоҳ (0)